Łukašenka pravieryŭ fizpadrychtoŭku hienierałaŭ. «Usie pakazali tolki vydatnyja vyniki»
Pa daručeńni Łukašenki byli praviedzienyja kantrolnyja zaniatki pa fizičnaj padrychtoŭcy vyšejšaha aficerskaha składu siłavych viedamstvaŭ. Pra vyniki pravierki žurnalistam raskazaŭ dziaržsakratar Rady biaśpieki Alaksandr Valfovič, piša BiełTA.
Načalnik Hienštaba hienierał-major Pavieł Muraviejka. Fota pres-słužby Minabarony
«Akcent zrobleny na jakaści praviadzieńnia mierapryjemstvaŭ jak apieratyŭnaj, tak i bajavoj padrychtoŭki, pakolki asnovaj jakasnaha vykanańnia zadač pa pryznačeńniu źjaŭlajecca fizičnaja padrychtoŭka, fizičnaja vynoślivaść vajskoŭcaŭ. Zychodziačy z hetaha Łukašenkam była pastaŭlena zadača Dziaržsakrataryjatu Rady biaśpieki arhanizavać i pravieryć fizičnuju padrychtoŭku kiraŭničaha składu ŭsich struktur sistemy zabieśpiačeńnia nacyjanalnaj biaśpieki našaj krainy. To bok usich hienierałaŭ i aficeraŭ, jakija znachodziacca na vyšejšych vajskovych pasadach», — raskazaŭ Valfovič.
Pad pravierku trapili ŭsie hienierały i pałkoŭniki, jakija zajmajuć hienieralskija pasady, z 11 siłavych viedamstvaŭ. Niahledziačy na toje, što zaniatki arhanizoŭvaŭ Dziaržsakrataryjat Rady biaśpieki, u stroj taksama byŭ pastaŭleny i vyšejšy aficerski skład hetaj struktury.
Kantrolnyja zaniatki praviali z pryciahnieńniem śpiecyjalistaŭ Spartyŭnaha kamiteta Uzbrojenych sił na bazie Minskaha suvoraŭskaha vajskovaha vučylišča i Centralnaha doma aficeraŭ. Vajskoŭcy vykonvali praktykavańni na vynoślivaść, u pryvatnaści, bieh na 500 m abo płavańnie na 100 m, i na siłu — padciahvańnie na pierakładzinie abo kompleksnaje siłavoje praktykavańnie. Pa vynikach pravierki byŭ adznačany vysoki ŭzrovień fizičnaj padrychtoŭki słužbovych asob.
«Usie pravieranyja słužbovyja asoby pakazali tolki vydatnyja i dobryja acenki. Nivodnaj niezdavalniajučaj, zdavalniajučaj acenki nie było atrymana. Pry hetym 70 % vydatnych acenak i 30 % — dobrych. Radasna, što ŭsie ministry, kiraŭniki ŭsich viedamstvaŭ atrymali tolki vydatnyja adznaki», — dadaŭ Alaksandr Valfovič.