Hubiernatary vystupajuć z zaklikami da biełarusaŭ nie lotać u Rasiju. Pres-słužby vinavaciać štučny intelekt

U siecivie źjaŭlajucca videazvaroty kiraŭnikoŭ biełaruskich abłaściej, u jakich jany aścierahajuć suhramadzian ad padarožžaŭ samalotami ŭ Rasiju, źviartajučy ŭvahu na toje, što heta niebiaśpiečna z-za vajennych umoŭ. Praŭda, pres-słužby zapeŭnivajuć, što zvaroty fejkavyja i zhienieravanyja štučnym intelektam.

Fejkavaje vystupleńnie Ivana Krupko

Na hety momant viadoma pra zvaroty ad imia staršyni Bresckaha abłvykankama Piatra Parchomčyka i jahonych homielskaha i mahiloŭskaha kaleh Ivana Krupko i Anatola Isačanki.

Usie zvaroty majuć identyčny źmiest, u ich čynoŭniki zajaŭlajuć pra toje, što ŭ Rasii nibyta adbyŭsia incydent ź biełaruskim samalotam, jaki «abstralała» rasijskaja SPA (niadaŭna my pisali pra hety fejk).

«Chaču nahadać, pry kupli avijabileta dla palotu ŭ Rasiejskuju Fiederacyju nieabchodna ŭśviedamlać usie ryzyki», — zajaŭlajuć hubiernatary, śćviardžajučy, što «ŭ Rasii idzie vajna z Ukrainaj i sistemy supraćpavietranaj abarony Sajuznaj dziaržavy mohuć u kožny momant pryniać pavietranaje sudna za varožy bieśpiłotnik».

Pres-słužby abłvykankamaŭ śćviardžajuć, što hałasy čynoŭnikaŭ zhienieravanyja štučnym intelektam, a ŭ jakaści karcinki, na jakuju nakładaŭsia huk, uziatyja videa ź ich realnymi vystupleńniami.

Tak, videa z Parchomčykam było zapisana jašče ŭ 2023 hodzie, i ŭ im jon «kamientavaŭ pasiadžeńnie Pracoŭnaj hrupy pa supracoŭnictvie Respubliki Biełaruś i Respubliki Tatarstan RF».

U svaju čarhu, Ivan Krupko byŭ zapisany ŭ Kazachstanie, dzie «ŭ realnaści tady […] raskazvaŭ žurnalistam pra rost pastavak techniki ŭ Kazachstan i pašyreńnie mižrehijanalnaha supracoŭnictva».

Kamientary da artykuła