U Smarhoni žančyna nie chacieła iści ad siabroŭki, tamu jaje pryjaciel paviedamiŭ pra hranaty
5 červienia a 22:31 u Smarhonski RAUS patelefanavaŭ mužčyna, jaki paviedamiŭ, što ŭ kvatery ŭ žycharki rajcentra na stale lažać hranaty, i adrazu pakłaŭ słuchaŭku.
Na miesca vyjechali supracoŭniki milicyi, bojeprypasaŭ nie było vyjaŭlena, paviedamlaje abłasnaja milicyja.
Paśla hetaha pačalisia apieratyŭna-vyšukovyja mierapryjemstvy, nakiravanyja na ŭstanaŭleńnie asoby iłžeminiora. Im akazaŭsia 45-hadovy mužčyna.
Jon rastłumačyŭ, što ŭ toj dzień znachodziŭsia ŭ stanie ałkaholnaha apjanieńnia i pryjšoŭ da znajomaj, kab zabrać dadomu svaju sužycielku. Adnak taja nie chacieła sychodzić, tamu mužčyna vyrašyŭ vyvieści jaje z kvatery «niezakonnym» sposabam.
Dziejańni iłžeminiora Smarhonskim rajonnym adździełam Śledčaha kamiteta kvalifikavanyja pavodle artykuła «Śviadoma iłžyvaje paviedamleńnie pra niebiaśpieku». I sankcyja praduhledžvaje pakarańnie da piaci hadoŭ źniavoleńnia.