«Bitva tytanaŭ» — hrecka-halivudzkija mify
Pra Piersieja, Miaduzu Harhonu i spažyvieckaje ščaście
ZŠA — Vialikabrytanija, 2010, kalarovy, 3D, 118 chv.
Režysior: Łui Leterje
Roli vykonvajuć: Sem Ŭortynhtan, Łajam Nisan, Ralf Fajnz, Džejsan Fleminh, Džema Artertan, Aleksa Davałas
Žanr: Fantastyčnyja pryhody pavodle hreckich mifaŭ i adnajmiennaha filmu 1981 hodu
Adznaka: 5,5 (z 10)
Piersiej — vychavany ludźmi syn Zieŭsa. Ale jahonych pryjomnych baćkoŭ zabivaje Aid. Alimpijskija bahi pomściać ludziam za ichniuju abyjakavaść i paŭstańni. Admysłovaja hadaść — Krakien, jaki musić razburyć horad Arhas i sažrać pryncesu Andramiedu. Piersiej vypraŭlajecca ŭ niebiaśpiečnaje vandravańnie, kab vyratavać ludziej.
Halivudzkija mifatvorcy papaŭtorna źviarnulisia da spadčyny staražytnaje Hrecyi. Paśla niadaŭniaha «Piersi Džeksana», dzie napaŭboh Piersiej byŭ padletkam, na ekranie bolš važkaja artyleryja. Śpiecnazaviec z «Avataru» Sem Ŭortynhtan bjecca ź Miaduzaj Harhonaj, vandruje ŭ piekła, abaraniaje krasuniaŭ (dźvie štuki) — i pałochaje dresiravanych skarpijonaŭ.
Zbolšaha karcina ažyŭlaje viadomy ź dziacinstva siužet , udała prytarnoŭvajučy jaho pad sučasny kinabiznes. Alimpijskija bahi — falšyvyja i padstupnyja stody. Miamla Zieŭs (Łajam Nisan), popielna-bieły Aid (Ralf Fajnz), žanočyja bostvy z rekłamna-bliskučymi zubkami.
Ludzi ŭžo nie nastolki pierakanaŭčyja. Jany, viadoma, buntujuć, i, byccam by, jak hreckija pratatypy zmahajucca suprać losu.
Ale nie pierajmajciesia — heta bunt za sałodkuju poliŭku i ŭłasny abahoŭleny status.Chitry Zieŭs papiaredžvaje: ciabie, Piersiej, zrobiać boham. I heta tak.
Semu Ŭortynhtanu samy čas apraŭdacca za kašeča-fijaletavuju Pandoru — i dakazać, što jon čałaviek — na halivudzkim Alimpie.