U Žodzinie baćku samomu daviałosia dapamahać dziciaci paśla admovy daktaroŭ

U Žodzinie adbyŭsia incydent, jaki vyklikaŭ burnaje abmierkavańnie siarod miascovych žycharoŭ. Alaksandr, baćka trochhadovaj dziaŭčynki, raskazaŭ, što jany z dačkoj źviarnulisia ŭ pryjomnaje adździaleńnie miascovaj balnicy, bo ŭ dziaŭčynki ŭ vuchu zachras niejki pradmiet. Jany pračakali 45 chvilin łor-doktara, ale toj, pryjšoŭšy, admoviŭsia ahladać dzicia, spasłaŭšysia na toje, što lečyć tolki darosłych, piša Ex-press.live.

Fota: t.me/sveZHOdino

U vyniku baćkam daviałosia jechać u Minsk. Pa darozie Alaksandr samastojna vyciahnuŭ čužarodny pradmiet z vucha dački. U Minskaj abłasnoj dziciačaj kliničnaj balnicy potym paćvierdzili, što zdaroŭju dziaŭčynki ničoha nie pahražaje.

Fota: t.me/sveZHOdino

Padčas abmierkavańnia incydentu ŭ žodzinskim čacie inšyja žychary taksama raskazali, što sutykalisia z anałahičnymi situacyjami — kali doktar byŭ na miescy, ale admaŭlaŭsia ahladać dzicia. Ludzi aburajucca, što navat u ekstrannych vypadkach mieddapamoha niedastupnaja, a pryjomnaje adździaleńnie nie nakiroŭvaje adrazu ŭ adpaviednuju ŭstanovu, prymušajučy čakać daremna.

U administracyi balnicy patłumačyli, što dzicia ŭsio ž ahledzieli dva śpiecyjalisty, ale takija vypadki pavinny absłuhoŭvacca na abłasnym uzroŭni, dzie jość nieabchodnaje abstalavańnie. Adnak mnohija karystalniki ličać tłumačeńni niezdavalniajučymi i padkreślivajuć, što ŭ Žodzinie niama dziaržaŭnaha dziciačaha łora, dastupnaha dla nasielnictva.

Heta situacyja zakranuła važnuju prablemu — niedastatkovuju dastupnaść i jakaść miedycynskaj dapamohi dzieciam u Žodzinie. Ludzi zaklikajuć nie maŭčać i paviedamlać pra padobnyja vypadki ŭ adpaviednyja orhany.

Kamientary da artykuła