«Jak dabivacca praŭdy?» Paśla śmierci školnicy ŭ balnicy Jelska baćkam nie dajuć nijakaj infarmacyi pra rasśledavańnie

Bolš za dva miesiacy prajšło z momantu trahiedyi ŭ Jelsku, dzie ŭ rajonnaj balnicy pamierła 14-hadovaja školnica. SK tady paviedamlaŭ ab praviadzieńni pravierki, ale z tych časoŭ nijakaj infarmacyi ab chodzie rasśledavańnia nie źjaviłasia, piša «Fłahštok».

Pamierłaja školnica. Fota: sacsietki

Jak vyśvietliłasia, baćkam dziaŭčynki taksama ničoha nie viadoma pra vyniki pravierki. Z hetaj nahody baćka školnicy vykłaŭ u sacsietki emacyjnaje videa, u jakim padzialiŭsia svaim bolem.

Taksama mužčyna prakamientavaŭ sproby pryznać jaho šmatdzietnuju siamju jak tuju, jakaja znachodzicca ŭ sacyjalna niebiaśpiečnym stanoviščy.

«Dva miesiacy ŭ mianie niama dački. Ja šukaju jaje kožny dzień, kožny viečar na vulicy, na bałkonie ja sprabuju vyhladać svaju dačku. Mnie brakuje jaje, jana była mnie vielmi darahaja. Bačačy inšych dziaŭčatak, ja baču svaju dačku. Čas lekuje? Nie. Tamu ja prašu, paviedamicie mnie, što adbyvajecca ciapier», — publična źviarnuŭsia mužčyna.

Jon raskazaŭ na videa:

«Nichto ničoha nie paviedamlaje. Ja ŭdakładniaŭ — mnie skazali: my ničoha nie viedajem, u Minsku zajmajucca. Byli vyniki ekśpiertyzy, nie byli — ja nie viedaju. U kaho pytacca, kamu telefanavać? Ci treba niejkija skandały ładzić, kab niešta daviedacca? Jak dabivacca praŭdy?»

Sa słoŭ mužčyny, doktarka, jakaja pryznačała dziciaci kropielnicu, paśla jakoj jana raptam straciła prytomnaść i nieŭzabavie pamierła, nie była adchilenaja ad pracy na čas pravierki:

«Nichto nie pakarany, nikoha nie adchilili. Ja ničoha nie viedaju. Ciša. Hłuchaja ciša».

Kamientary da artykuła