Pastavić namiot — ad 70 rubloŭ, šaŭrma pa 20, duš za 10: jak sielota prachodzić Viva Braslav
Siarod chedłajnieraŭ Niuša, Lusia Čabocina i Ełdžej. Vystupiŭ taksama techna-hurt Police in Paris — u im hraje ŭnuk Mulavina.
Skrynšot videa ŭ tyktoku
Na starcie prodažu kvitki na open-eir Viva Braslav sioleta kaštavali ad 125 rubloŭ za «standart» da 490 rubloŭ za VIP. Bližej da mierapryjemstva ceny dachodzili ŭžo da 800 rubloŭ.
Tradycyjna šmat pytańniaŭ u ludziej uźnikaje z tym, dzie žyć try fiestyvalnyja dni. Samy tanny varyjant ad arhanizataraŭ — namiotavy łahier. U im miesca dla adnaho čałavieka kaštuje 70 rubloŭ. Pryniać duš tut abydziecca ŭ 10 rubloŭ.
Arhanizatary abiacali zabiaśpiečyć usio nieabchodnaje — ad zaradnych kuboŭ i hrymiorak ź lusterkami da łaŭndž-zon. Navat pravieryć uzrovień ałkaholu kiroŭcy mohuć pierad tym, jak sieści za rul.
Ale da farmatu łahieru ŭsio ž jość pretenzii. U instahramie Viva Braslav možna pabačyć prapanovy ŭvieści abaviazkovy režym cišyni chacia b na niekatoruju častku nočy. Adna ź dziaŭčat skardziłasia na toje, što letaś niećviarozyja ludzi psavali ŭražańnie ad festu svaimi krykami da 4 ranicy — praź ich ža nie było adčuvańnia biaśpieki.
I, kali pahladzieć videa niekatorych udzielnikaŭ, stanovicca zrazumieła, što prablema z ałkaholem sapraŭdy isnuje. U adnym z tyktokaŭ mužčyna raspaviadaje, što «złaviŭ prychod» usiaho paśla 0,5 piva.
— Na staryja droždžy nakidvaje ŭvohule kankretna siońnia.
Zrabili i ŭžo tradycyjny hłempinh. Tam zamiest zvyčajnych namiotaŭ ustalavanyja nievialikija domiki z draŭlanaj padłohaj. Unutry praduhledžany narmalnyja łožki z matracami i kamplektami dla snu, nievialiki chaładzilnik ź mini-baram, kresły.
Ceny na hłempinh — jak na numar u piacizorkavym hateli. Samy luksavy varyjant kaštavaŭ 2600 rubloŭ za dvaich na 4 dni. Ale pry hetym usie miescy raskupili za miesiac da startu mierapryjemstva.
Miesca dla aŭtadomu na 4 dni kaštuje sioleta amal 445 rubloŭ.
Niechta ź miełamanaŭ aranduje miesca dla namiotu ŭ dvarach miascovych žycharoŭ. Tyja prosiać 20 rubloŭ za sutki.
Ale ž chapaje tych, chto choča bolš kamfortnyja ŭmovy i sprabuje arandavać kvateru ci dom. Daśviedčanyja tusoŭščyki pačynajuć šukać varyjanty ažno za paŭhoda da patrebnaj daty. Ale, akazvajecca, heta nie harantuje absalutna ničoha.
Adna dziaŭčyna raspaviała ŭ tyktoku pra niečakanyja niepryjemnaści, ź jakimi sutyknułasia jaje kampanija. Kiempinh, niahledziačy na pryvabny košt, maładym ludziam nie padychodziŭ: chvalavalisia za biaśpieku ŭłasnych rečaŭ, a taksama za toje, što niechta nočču moža pierabłytać namiot. Dy i zaležać ad pryrodnych kapryzaŭ biełaruskaha leta nie vielmi chaciełasia.
Letaś hetaja ž kampanija arandavała domik i zastałasia ŭsim zadavolenaja. Sioleta dziaŭčyna adkazna padyšła da pošukaŭ:
— Ja patelefanavała 40 ludziam i jašče 15 napisała. Dvoje sutak — ad 1200 da 1600 rubloŭ na 8 čałaviek. Ašaleć, tak? Heta ŭ Biełarusi. U vyniku my znajšli žyllo ŭ horadzie. Biez «vaŭ», košt akiej, pieradapłata minimalnaja.
Ale za miesiac da mierapryjemstva dziaŭčyna vyrašyła na ŭsialaki vypadak paćvierdzić, ci ŭsie damoŭlenaści zastajucca ŭ sile, i pačuła, što žyllo toje zdać nie mohuć.
— Vyśvietliłasia, uładar doma ałkazaležny, moža tudy pryjechać i niešta narabić. Prapanavali absalutna niealternatyŭny varyjant kvatery dla 4 spalnych miescaŭ. Nahadaju, što nas 8 čałaviek.
Pryčynu dziaŭčyna ličyć adekvatnaj, ale ŭsio roŭna aburana tym faktam, što arandatar nie raspavioŭ pra jaje sam i čakaŭ čahości. Adšukać novaje žyllo kampanija nie zmahła.
— Mienš za 100 dalaraŭ na čałavieka na pieryjad fiestyvalu nichto nie prapanoŭvaje. Tamu my vyrašyli zdać kvitki. Darečy, viartajuć 75% koštu kvitkoŭ. I heta, darečy, całkam zakonna.
U kamientaryjach dziaŭčyna ździŭlajecca, što za stolki hadoŭ arhanizatary fiestyvalu nie stvaryli ŭłasnuju bazu arendnaha žylla, kab ablehčyć pošuki naviedvalnikam.
U kamientaryjach dziaŭčynu padtrymali. Niechta napisaŭ, što sioleta admoviŭsia ad idei jechać na Viva Braslav praz toje, što žyllo kaštuje pryblizna jak kryło samalota.
Ceny na fudkorcie taksama aktyŭna abmiarkoŭvajuć u sacsietkach. Za šaŭrmu prosiać 20 rubloŭ, za kielich piva — 7-8. Niechta stavicca da taho z parazumieńniem, bo «fiestyval — nie krama». A niechta ščyra aburany.
Adzin z udzielnikaŭ iranična prademanstravaŭ buterbrod, za jaki zapłaciŭ 14 rubloŭ. Toj lohka pamiaściŭsia na dałoni ŭ mužčyny — źjeŭ bułku z načynkaj litaralna za adzin ukus.
Čytajcie taksama:
Chedłajnierami Viva Brasłaŭ-2025 buduć Niuša i Lusia Čabocina