Tramp uvioŭ pošliny 50% na tavary z Brazilii

Prezident ZŠA Donald Tramp 30 lipienia padpisaŭ šerah ukazaŭ, datyčnych handlovaj palityki krainy. Siarod inšaha jon uvioŭ 50% pošliny na tavary z Brazilii, paviedamlaje CNN.

Donald Tramp z tahačasnym prezidentam Brazilii Žairam Bałsanaru 8 sakavika 2020 hoda. Fota: Alan Santos/Gabinete da Presidência do Brasil via AP

Tramp raniej užo pahražaŭ uvieści 50% pošliny na tavary z Brazilii z 1 žniŭnia, kali ŭłady krainy nie spynić sudovy praces suprać byłoha prezidenta Žaira Bałsanaru, palityčnaha sajuźnika Trampa. Ciapier hetaja miera zaćvierdžanaja i pavialičvaje raniejšyja pošliny na 40% — raniej jany byli 10-pracentnyja. 

Žaira Bałsanaru, suprać suda nad jakim pratestuje Tramp, vinavaciać u sprobie dziaržaŭnaha pieravarotu. Va ŭkazie Trampa havorycca, što pieraśled eks-prezidenta i jaho prychilnikaŭ z boku brazilskich uładaŭ nibyta źjaŭlajecca palityčnym i parušaje pravy čałavieka.

U hety ž dzień ZŠA ŭviali sankcyi suprać sudździ Viarchoŭnaha suda Brazilii Alaksandra de Marajesa i ŭviali vizavyja abmiežavańni jašče suprać niekalkich čynoŭnikaŭ, jakija ŭdzielničajuć u pracesie suprać Bałsanaru.

Akramia pošlin, skiravanych suprać Brazilii, Tramp taksama ŭstanaviŭ 50% myta na paŭfabrykaty ź miedzi (truby, draty, listy) i pradukty z vysokim utrymańniem miedzi. U Biełym domie zajavili, što heta robicca dla abarony nacyjanalnaj biaśpieki i padtrymki ŭnutranaj miednaj pramysłovaści. Myta nabudzie siłu taksama z 1 žniŭnia. U 2024 hodzie ZŠA impartavali miedzi na $17 miljardaŭ, bolš za ŭsio — z Čyli ($6 miljardaŭ).

Tramp taksama admianiŭ tak zvany de minimis — padatkovuju lhotu, jakaja dazvalała biazmytna ŭvozić u krainu pasyłki vartaściu da $800. Heta mocna zakranie internet-kramy kštałtu Shein i Temu, jakija masava karystalisia hetaj schiemaj, u tym liku praz Kitaj i Hankonh.

Kamientary da artykuła