«Spała i pračnułasia na abłomkach unizie». Historyja dziaŭčyny, jakaja padčas ataki Rasii na Kijeŭ vypała z 9-ha paviercha i vyžyła
Padčas masiravanaj ataki Rasii na Kijeŭ u noč na 31 lipienia 23-hadovaja Vieranika vypała ź dziaviataha paviercha i cudam vyžyła. Ciapier jana znachodzicca ŭ balnicy.Historyju dziaŭčyny raskazali «Suśpilnie» i Bi-bi-si — Ukraina.
Fota: Suśpilnie
Pa słovach Vieraniki, u toj dzień joj było tryvožna. Jana viartałasia dadomu ŭžo pozna ŭviečary, kali pačałasia ataka dronaŭ.
«Ja čuła, jak hetyja šachiedy latajuć. Ja chavałasia ad ich pad drevami, kali išła dadomu», — uspaminaje Vieranika.
Dziaŭčyna kaža, što padčas «pavietranaj tryvohi» ŭ bambaschovišča nikoli nie chodzić. Jak vypała ź dziaviataha paviercha — nie pamiataje.
«Ja nie viedaju jak. Ja prosta spała i pračnułasia ŭžo na abłomkach unizie. I, chutčej za ŭsio, niejak saśliznuła. Ja nie viedaju, jak heta naohuł adbyłosia. Nibyta heta takaja levitacyja», — raskazała žurnalistam Vieranika.
Jana miarkuje, što jaje mahło vykinuć z kvatery prosta razam z łožkam.
«Ja nie ŭśviedamlała, što ja rablu, u mianie byŭ prosta šok. Ja pahladzieła na nahu — pačałasia jašče bolšaja panika», — kaža dziaŭčyna.
Baćki Vieraniki zahinuli, adnak jana pra heta nie viedaje.
Ciapier dziaŭčyna špitalizavanaja. U jaje vyjaŭleny pierałom nahi, čerapna-mazhavaja traŭma i strasieńnie mozhu, adznačaje Siarhiej Dubroŭ, dyrektar balnicy, u jakoj znachodzicca paciarpiełaja.
«Naohuł dziŭna: adbyłosia padzieńnie ź dziaviataha paviercha, i pry hetym — adnosna niaznačnyja traŭmy. Ale jość vostryja psichičnyja razłady ŭ vyniku stresu. Jana pakul nie viedaje, što adbyłosia ź jaje baćkami», — kaža Dubroŭ.
U vyniku ŭčorašniaj ataki na Kijeŭ zahinuŭ 31 čałaviek, u tym liku piaciora dziaciej