Dziaržaŭnyja prapahandysty abviaścili Bondaravu «škodnaj zmaharkaj»
Pakul viadomaja danosčyca Volha Bondarava jeździć pa kitajskaj Mančžuryi (fotarepartažy adtul apošnimi dniami rehularna źjaŭlajucca ŭ jaje telehram-kanale), u aficyjoznaj «Minskaj praŭdzie» jaje aficyjna samu zaličyli da liku nienavisnych joj «zmaharoŭ».
Skrynšot ź videa
Videasiužet «Minskaj praŭdy» byŭ pryśviečany ablivańniu brudam pradstaŭnikoŭ demakratyčnych siłaŭ, jakich viadučaja pahardliva nazyvaje «zmaharami». Ale ŭ peŭny momant jana zrabiła «liryčnaje adstupleńnie» ad ahulnaj płyni i źviarnuła ŭvahu na jašče adzin aśpiekt:
«Zmahańnie — praces biaskoncy. Mianiajucca mety — nie źmianiajecca sutnaść.
Pa hetaj pryčynie zmaharami možna i treba nazyvać nie tolki pradstaŭnikoŭ apazicyi, ale i tych, chto pastajanna z kimści jarasna zmahajecca ŭžo pad nacyjanalnym [čyrvona-zialonym] ściaham i nibyta z dobrymi namierami».
Proźviščaŭ prapahandystka nie nazyvała, ale akurat u hety čas kala jaje ŭspłyŭ partret Volhi Bondaravaj.
«Ničoha dobraha i heta zmahańnie nie pryniasie — tamu što kali metaj źjaŭlajecca znajści abjekty, suprać jakich treba zmahacca, ich znojduć navat u bočcy miodu. A łyžku dziohciu, urešcie, možna i samastojna ŭ bočku zapuścić — dla zmahańnia. Abo prydumać, što jana tam jość», — zajaviła prapahandystka.
Viadomaja danosčyca Volha Bondarava z 2020 hoda aktyŭna zmahajecca z usim, što padajecca joj pahrozaj dla «ruskaha śvietu» i «tradycyjnych kaštoŭnaściaŭ». Pry hetym jana časta błytaje bierahi, nakidvajučysia z abvinavačvańniami na vysokich čynoŭnikaŭ, siłavikoŭ i navat na členaŭ siamiejnaha kłana samoha Łukašenki.
Joj niekalki razoŭ rabili papiaredžańni, a ŭrešcie heta skončyłasia karotkačasovym zatrymańniem. 26 sakavika sud Maskoŭskaha rajona Minska pryniaŭ rašeńnie ab aryšcie danosčycy na 13 sutak. Ale navat adbyŭšy termin, jana nie spyniła svajoj dziejnaści. Pry hetym krytyčna i navat varoža adnosna Bondaravaj niaredka vykazvajucca navat samyja adyjoznyja prapahandysty łukašenkaŭskaha režymu kštałtu Andreja Mukavozčyka, Ludmiły Hładkaj ci Ryhora Azaronka.
Čytajcie taksama:
Hurt «Drazdy» pakidaje scenu i vinavacić u hetym «hipieraktyŭnych błohieraŭ»
Hładkaja nazvała Bondaravu i Mirsalimavu čarviami. Azaronak i Łukjanaŭ patrabujuć likvidacyi