Rasija nanosić udary pa azierbajdžanskich naftahazavych abjektach va Ukrainie

U noč na 8 žniŭnia 2025 hoda Rasija naniesła ataku dronami «Šachied» pa naftavaj bazie azierbajdžanskaj kampanii SOCAR u Adeskaj vobłaści Ukrainy. U vyniku ataki ŭźnik pažar, byŭ paškodžany trubapravod z dyzielnym palivam, piša «Jekonomična pravda». 

Ilustracyjny zdymak. Fota: Getty Image

Pažar udałosia chutka łakalizavać, ale čatyry rabotniki atrymali surjoznyja traŭmy i byli špitalizavanyja. Ciapier viadziecca acenka škody i pravodziacca avaryjnyja adnaŭlenčyja raboty.

Pavodle ŭkrainskich pravaachoŭnikaŭ, hetaja naftabaza była hałoŭnaj cellu ŭdaru, bo ŭsie piać dronaŭ trapili mienavita tudy.

Heta druhaja ataka za apošni čas na azierbajdžanskija infrastrukturnyja abjekty va Ukrainie. Raniej udary byli naniesienyja pa hazaraźmierkavalnaj stancyi «Arłoŭka», jakaja źjaŭlajecca častkaj Transbałkanskaha hazapravoda — važnaha maršruta dla pastavak azierbajdžanskaha hazu va Ukrainu.

Na fonie pahroz i infarmacyjnaj kampanii ŭ rasijskich ŚMI, dzie zhadvajucca azierbajdžanskija abjekty jak «zakonnyja celi», isnuje ryzyka novych udaraŭ pa infrastruktury SOCAR va Ukrainie.

28 lipienia 2025 hoda Ukraina ŭpieršyniu impartavała azierbajdžanski haz praz Transbałkanski kalidor.

Kamientary da artykuła