Čamu Łukašenka nie Alijeŭ

Rasija tracić mižnarodny ŭpłyŭ

Kinuŭšy ŭsie siły i resursy na vajnu suprać Ukrainy, Rasija niečakana atrymała pabočny efiekt u zamiežnaj palitycy. Mocna ŭzrasła jaje zaležnaść ad Kitaja. A adnačasova značna i vielmi zaŭvažna źmienšyŭsia ŭpłyŭ Maskvy ŭ inšych rehijonach śvietu.

U pryvatnaści, mocna ŭpała mižnarodnaja vaha RF na Blizkim Uschodzie. Minułym hodam abrynuŭsia režym Bašara Asada ŭ Siryi, jaki trymaŭsia na rasijskaj padtrymcy. Miesiac tamu druhi sajuźnik Rasii — Iran — paciarpieŭ parazu ŭ vajnie ź Izrailem i ZŠA. Ciapier płany adnaŭleńnia vajennaha patencyjału irancy źviazvajuć nie z Rasijaj, a z Kitajem.

Na vačach adbyvajecca strata rasijskaha ŭpłyvu na Paŭdniovym Kaŭkazie. Spačatku Armienija pryjšła da vysnovy, što Rasija jak hałoŭny sajuźnik zdradziła joj, i pačała dystancyjavacca ad Maskvy. Jana zamaroziła svajo siabroŭstva ŭ ADKB i šukaje padtrymki ŭ inšych miescach. Uzmacniajucca suviazi Jerevana z Zachadam. Armienija sprabuje narmalizavać adnosiny sa svaim adviečnym voraham Turcyjaj.

I voś ciapier na adkryty kanflikt z Rasijaj pajšoŭ Azierbajdžan. Z samaha pačatku niezaležnaha isnavańnia hetaja kraina imknułasia paźbiahać ščylnych suviaziaŭ z Maskvoj. Majučy svaje zapasy nafty, Baku pašyraŭ pole dla manieŭru. Azerbajdžan uchiliŭsia ad siabroŭstva ŭ ADKB i JEAES. A ciapier robić rašučyja kroki, kab addalicca ad Rasii.

Kanflikt Azierbajdžana z Rasijaj i ŭroki dla Biełarusi

Dośvied Azierbajdžana daje peŭnyja ŭroki i dla Biełarusi.

1. Azierbajdžan razburaje stereatypy, jakija ŭkaranilisia ŭ śviadomaść palityčnaj elity i ekśpiertnaj supolnaści. Jany palahajuć u tym, što demakratyčnyja ci paŭdemakratyčnyja režymy na postsavieckaj prastory aryjentujucca ŭ svajoj zamiežnaj palitycy na Zachad, a dyktatury šukajuć ščylnaha sajuzu z Rasijaj jak haranta zachavańnia aŭtakratyj i supraćjadździa ci antydota suprać «kalarovych revalucyj».

Azierbajdžan — kłasičny aŭtarytarny režym, da 2020 hoda bolš žorstki, čym biełaruski. Tym nie mienš, kłanu Alijeva nie patrebnaja padtrymka Rasii dla ŭtrymańnia ŭłady.

2. Azierbajdžanski dośvied paćviardžaje vysnovu, jakaja i dasiul była bolš-mienš zrazumiełaja: pazbaŭleńnie ad kantrolu z boku Rasii moža adbyvacca tolki praz kanflikt. Impieryja prosta tak nikoha adpuskać z zony svajho ŭpłyvu nie źbirajecca. Heta paćviardžaje i dośvied Hruzii, i, asabliva, dośvied Ukrainy. Voś ciapier Baku daviałosia iści na žorstkaje supraćstajańnie z Maskvoj, kab pazbavicca zaležnaści ad jaje.

3. Kiraŭnictva Azierbajdžana pajšło na kanflikt z Maskvoj, majučy mocnyja pazicyi. Za plačyma Ilchama Alijeva — pieramoha ŭ vajnie za Karabach, viartańnie hetaj terytoryi pad kantrol Azierbajdžana. Hety vobraz «Pieramožcy», pryznany hramadstvam, nadaje jamu realnuju papularnaść, daje svabodu ruk u zamiežnaj i ŭnutranaj palitycy.

U Alaksandra Łukašenki niama takoj historyi pośpiechu. Pieramoha nad narodnym pratestam u 2020 hodzie davoli sumnieŭnaja. Jana atrymanaja nie nad vonkavym voraham, a nad ułasnym narodam. Miarkujučy pa tym, jak jon uvieś čas zhadvaje tyja padziei, zrazumieła, što jamu davodzicca dakazvać słušnaść toj pieramohi. Jana nie pryznajecca za pieramohu prynamsi pałovaj nasielnictva. Ciažka vyznačyć realnuju papularnaść Łukašenki, ale ŭ lubym vypadku jana nieparaŭnalnaja z toj, što maje Alijeŭ. I heta mocna abmiažoŭvaje svabodu ruk, bo davodzicca ŭvieś čas ahladacca vakoł, zvažać na toje, što skažuć unutranyja i vonkavyja palityčnyja subjekty.

Pra sajuźnikaŭ i čyńnik nacyjanalizmu

4. Navat tuju ŭmoŭnuju pieramohu ŭ 2020 hodzie Łukašenka atrymaŭ, u značnaj stupieni, dziakujučy padtrymcy Rasii. I heta pryviało da mocnaj zaležnaści łukašenkaŭskaj Biełarusi ad Maskvy.

Azierbajdžan atrymaŭ svaju pieramohu ŭ karabachskim kanflikcie biez udziełu Rasii. Tamu maje mahčymaść ihnaravać pazicyju Maskvy.

5. Baku zmoh znajści mocnaha sajuźnika pa-za miežami postsavieckaj prastory. Heta Turcyja. Abapirajučysia na hetaha chaŭruśnika Azierbajdžan moža supraćstajać cisku Rasii.

Biełaruś taksama imkniecca znajści sajuźnika pa-za miežami Sajuznaj dziaržavy. Ale atrymlivajecca nie vielmi. Zachad ciapier nie moža być niejkim punktam apory, naadvarot, źjaŭlajecca pahrozaj dla režymu Łukašenki.

Minsk imkniecca atrymać padtrymku Kitaja. Adnak u momant niejkaha niachaj sabie i małaprahnazavanaha kanfliktu z Rasijaj naŭrad ci Piekin pryjdzie na dapamohu. I reč tut navat nie ŭ hieahrafii. Hałoŭnaje pytańnie ŭ tym, navošta heta Kitaju. Naŭrad ci Piekin hatovy psavać adnosiny z Maskvoj, kab padtrymać Łukašenku.

6. Alijeŭ maje mahčymaść abapiercisia na azierbajdžanski nacyjanalizm — mocnuju palityčnuju zbroju pry vonkavym supraćstajańni. Doŭhi čas jon padsiłkoŭvaŭsia kanfliktam z Armienijaj. Pieramoha ŭ vajnie za Karabach uźniała hety nacyjanalizm na novuju stupień. Ciapier Alijeŭ vykarystoŭvaje jaho suprać Rasii. Baku idzie na abmiežavańnie ŭpłyvu na krainu ideałohii «ruskaha śvietu». Začyniena pradstaŭnictva «Rossotrudničiestva» ŭ azierbajdžanskaj stalicy.

Łukašenka, naadvarot, viadzie niaspynnuju baraćbu ź lubymi prajavami biełaruskaha etnakulturnaha nacyjanalizmu, naściež adčyniŭ dźviery dla ideałohii «ruskaha śvietu». Sproby režymu raspalić nacyjanalistyčnyja žarści ŭ antypolskim kirunku nie mieli asablivaha pośpiechu. A voś u vypadku niejkaha kanfliktu z Rasijaj ułady nia majuć ideałahičnaha apiryšča, kab supraćstajać «ruskamu śvietu».

• 17
• 0
• 0
• 1
• 0
• 0
• 0
• 0