U Polščy troch biełarusaŭ sudziać za padpały handlovych centraŭ

Sud va Urocłavie pačaŭ razhlad spravy ab sieryi padpałaŭ handlovych abjektaŭ u rehijonie Trujmiasta (Hdańsk, Hdynia i Sopat) i Varšavie, jakija adbylisia ŭ 2023—2024 hadach. Siarod šaści abvinavačanych — troje palakaŭ i troje biełarusaŭ. Jak śćviardžaje polskaja prakuratura, jany dziejničali ŭ intaresach zamiežnaj raźviedki.

Biełarus Ściapan Kaściučenka, abvinavačany ŭ padpale šmatpaviarchovaj budaŭničaj kramy ŭ Varšavie ŭ krasaviku 2024 hoda. Fota: palicyja Polščy

Usie šaściora, pavodle śledstva, uvachodzili ŭ arhanizavanuju złačynnuju hrupu i zajmálisia sabatažam, niezakonnym abarotam zbroi i narkotykaŭ, a taksama inšymi złačynstvami.

Najbolš abvinavačańniaŭ vystaŭlena biełarusu Ściapanu Kaściučenku. Jamu inkryminujuć vosiem epizodaŭ — ad udziełu ŭ złačynnaj hrupie i padpału restarana ŭ Hdyni da niezakonnaha zachoŭvańnia vybuchoŭki i sprobaŭ naniasieńnia ciažkaj škody zdaroŭju. Taksama jaho vinavaciać u dvuch aktach sabatažu «pa zamovie zamiežnaj raźviedki» — sprobie padpału składa ŭ Hdańsku i padpale składa paddonaŭ u Markach pad Varšavaj u 2024 hodzie.

U hetych ža padpałach, pavodle danych prakuratury, udzielničali biełarusy Andrej Bieły i Jarasłaŭ S. Pieršyja dvoje častkova pryznali vinu, a Ściapan Kaściučenka jaje całkam admaŭlaje. Jon, Jarasłaŭ S. i palak Łukaš K. ciapier znachodziacca pad vartaj.

Akramia taho, Ściapana Kaściučenku padazrajuć u padpale bujnoha budaŭničaha hipiermarkieta ŭ Varšavie ŭ krasaviku 2024 hoda — nibyta taksama pa zamovie rasijskaj raźviedki. Za takija dziejańni polski zakon praduhledžvaje pakarańnie ad 10 hadoŭ da pažyćciovaha źniavoleńnia.

Śledstva pačałosia ŭ lutym 2024 hoda, a padstavaj stali danyja Ahientstva ŭnutranaj biaśpieki Polščy. Prakuratura zajaŭlaje, što hrupa zajmałasia viarboŭkaj i arhanizacyjaj dyviersij dla zamiežnych śpiecsłužbaŭ z metaj vyklikać niezadavolenaść u polskim hramadstvie i padarvać davier da ŭłady.

Kamientary da artykuła