U Polščy zatrymanyja 32 čałavieki za supracoŭnictva z rasijskimi śpiecsłužbami. Siarod ich jość i biełarusy
Premjer-ministr Polščy Donald Tusk paviedamiŭ, što ŭ Polščy byli zatrymanyja pa padazreńni ŭ supracoŭnictvie z rasijskimi śpiecsłužbami 32 čałavieki. Pavodle jaho słoŭ, hetyja ludzi padazrajucca ŭ tym, što vykonvali zadańni, źviazanyja z dyviersijami, padpałam i hvałtam. Siarod zatrymanych — hramadzianie Polščy, Rasii, Ukrainy i Biełarusi.
Adzin z abvinavačanych užo asudžany i adbyvaje pakarańnie, astatnija čakajuć suda.
Tusk padkreśliŭ, što heta nie izalavanyja vypadki, a častka bolš šyrokaj rasijskaj kampanii pa destabilizacyi situacyi ŭ Polščy, u tym liku na miažy. Jon zaklikaŭ usie śpiecsłužby być napahatovie i paabiacaŭ žorstkuju reakcyju na lubuju dziejnaść, što pahražaje biaśpiecy dziaržavy.
Taksama Tusk adznačyŭ, što dziakujučy dypłamatyčnym dziejańniam udałosia pieradać Polščy adnaho z arhanizataraŭ hetych dyviersij.
Polski premjer zajaviŭ heta, kamientujučy paviedamleńnie Ahienctva ŭnutranaj biaśpieki Polščy, što hramadzianinu Kałumbii byli vystaŭleny abvinavačańni ŭ padpale dvuch budaŭničych składaŭ u Mazavieckim vajavodstvie ŭ 2024 hodzie.
Pavodle źviestak polskaj śpiecsłužby, mužčyna dziejničaŭ pa zahadzie rasijskich śpiecsłužb. Jon atrymaŭ instrukcyi ab tym, jak vyrablać i vykarystoŭvać kaktejli Mołatava, a taksama jak karystacca transpartam dla złačynstvaŭ. Jaho dziejańni byli padobnyja da padpałaŭ, ździejśnienych u inšych krainach Jeŭropy.
Kałumbijec, jakomu ciapier vystaŭlenyja abvinavačańni ŭ Polščy, raniej, u červieni hetaha hoda, byŭ užo asudžany ŭ Čechii na 8 hadoŭ turmy za padpał aŭtavakzała ŭ Prazie i padrychtoŭku da padpału handlovaha centra. Jon pryznaŭ svaju vinu.
Pavodle źviestak polskich śpiecsłužbaŭ, rasijskija kuratary vierbavali vykanaŭcaŭ praz telehram-čaściej maładych mihrantaŭ, u tym liku z Łacinskaj Amieryki, a taksama ŭciekačoŭ. Im płacili za sačeńnie za abjektami, padpały, akty sabatažu i publikacyi nastupstvaŭ dyviersijnych aktaŭ u sacsietkach. Niekatoryja zatrymanyja vykonvali zahady za miažoj — u Čechii, Litvie i Hiermanii.
Biełarusu vystavili abvinavačańnie ŭ padpale hipiermarkieta ŭ Varšavie pa zadańni rasijskich śpiecsłužbaŭ
Biełarusu, raniej asudžanamu ŭ Polščy za špijanaž, pastrožyli pakarańnie
Padpał u vilenskaj IKEA letaś zładziŭ ukrainski padletak. Jon zachoŭvaŭ na vakzale sumku z vybuchoŭkaj, telefonami i vibratarami
«Haniebny akt dyviersii». Polšča začyniaje konsulstva Rasii ŭ Krakavie z-za padpału handlovaha centra
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč36
Kamientary