U rasijskim MZS patłumačyli, ź jakoj pazicyjaj Pucin pajedzie na Alasku

Namieśnik dyrektara Departamienta infarmacyi i druku rasijskaha MZS Alaksiej Fadziejeŭ paviedamiŭ na bryfinhu ŭ Maskvie, što terytaryjalnaje ŭładkavańnie Rasii zamacavana ŭ kanstytucyi krainy.

Uładzimir Pucin. Fota: Contributor Getty Image

Tak Alaksiej Fadziejeŭ adkazaŭ na prośbu prakamientavać pazicyju Maskvy adnosna mahčymaści abmierkavańnia «abmienu terytoryjami» z Kijevam padčas pieramoŭ Uładzimira Pucina z Donaldam Trampam 15 žniŭnia na Alascy.

«Tut, napeŭna, nie treba navat vynachodzić čahości. Terytaryjalnaje ŭładkavańnie Rasijskaj Fiederacyi zamacavana ŭ kanstytucyi našaj krainy. Hetym usio skazana», — skazaŭ Fadziejeŭ.

Dypłamat dadaŭ, što mety rasijskaj delehacyi na pieramovach z prezidentam ZŠA Donaldam Trampam na Alascy, jakija adbuducca 15 žniŭnia, «dyktujucca vyklučna nacyjanalnymi intaresami».

Jak viadoma, u Rasii nasupierak mižnarodnamu pravu pryniali rašeńnie ab aficyjnym uklučeńni Kryma i čatyroch ukrainskich abłaściej u svoj skład, uniosšy adpaviednyja źmieny ŭ kanstytucyju krainy. Paśla taho rasijskija ŭłady zajaŭlajuć, što nie pojduć na terytaryjalnyja sastupki i patrabujuć mižnarodnaha pryznańnia anieksavanych terytoryj za saboj, nastojvajučy na poŭnym vyvadzie ź ich ukrainskich vojskaŭ.

Hetyja patrabavańni byli ŭklučanyja ŭ rasijski varyjant miemaranduma ab spynieńni ahniu, pradstaŭleny na pieramovach u Stambule ŭ červieni. U pačatku žniŭnia 2024 hoda Pucin paćvierdziŭ, što ahučanyja im raniej umovy ŭrehulavańnia kanfliktu zastajucca niaźmiennymi.

Kamientary da artykuła