Zazulinskaja: Srodkaŭ na pryniaćcie 1300 palitviaźniaŭ moža nie chapić
Pradstaŭnica Abjadnanaha pierachodnaha kabinieta pa sacyjalnaj palitycy Volha Zazulinskaja prakamientavała padrychtoŭku da mahčymaha vyzvaleńnia palitźniavolenych.
Volha Zazulinskaja
Nahadajem, što ŭčora Alaksandr Łukašenka i Donald Tramp padčas telefonnaj razmovy ŭźniali pytańnie pra mahčymaje vyzvaleńnie 1300 palitviaźniaŭ.
«Navina pra mahčymy vychad jašče 1300 palitźniavolenych — heta važnaja nahoda ŭžo siońnia zadumacca pra zaŭtra. My ŭsie chacieli b, kab hetyja ludzi zmahli vyjści na svabodu i mieli sapraŭdny vybar — zastacca ŭ Biełarusi abo pakinuć krainu vyklučna pa ŭłasnym rašeńni, a nie praz prymusovuju departacyju. Pry lubym raźvićci padziej my pavinny być hatovyja pryniać lubuju kolkaść biełarusaŭ, navat kali heta budzie 1300 čałaviek adnačasova. Zaklikajem biełarusaŭ za miažoj užo ciapier rychtavacca da takoha scenaryja i abjadnoŭvacca, kab sustreć hetych ludziej i padtrymać ich» — zaznačyła Volha Zazulinskaja.
Ale, padkreśliła jana, niahledziačy na toje, što ŭ demakratyčnych sił jość Mižnarodny humanitarny fond, srodkaŭ u im moža akazacca niedastatkova dla takoj maštabnaj dapamohi.
«U vypadku, kali heta adbudziecca, my abvieścim pra kanały kamunikacyi dla ŭsich, chto hatovy budzie dałučycca da hetaha kroku salidarnaści. My šmat razoŭ dakazvali sabie i ŭsiamu śvietu, što biełarusy zaŭsiody padtrymajuć biełarusaŭ. I ja vieru, što i na hety raz my zdolejem spravicca razam», — adznačyła pradstaŭnica pa sacyjalnaj palitycy Kabinieta.
Pavodle pravaabarončaj supolnaści, pavodle źviestak na ranicu suboty, u Biełarusi 1185 palitviaźniaŭ.
Čytajcie taksama:
Łukašenka Trampu: Praca pa vyzvaleńni źniavolenych nie spyniajecca
Cichanoŭskaja: Vyzvalenyja musiać mieć mahčymaść zastacca ŭ Biełarusi