ZŠA pryznačyli novaha časovaha pavieranaha ŭ Biełarusi

U lipieni 2025 hoda ŭ Biełaruś pryznačyli novaha časovaha pavieranaha ŭ spravach ZŠA — Majkła Krejdlera. Pra heta paviedamlajecca na sajcie amierykanskaj dypłamatyčnaj misii, jakaja ciapier aficyjna pracuje nie ŭ Minsku.

Majkł Krejdler. Fota: by.usembassy.gov

Da novaha pryznačeńnia Krejdler pracavaŭ u Dziaržaŭnym departamiencie ZŠA ŭ śfiery presy i publičnaj dypłamatyi pa Jeŭropie i Jeŭrazii, a raniej — u adździele pa spravach Centralnaj Jeŭropy. Jon taksama zajmaŭ dypłamatyčnyja pasady va Ukrainie, Pakistanie, Kyrhyzstanie, Kosavie i Armienii.

Maje stupień mahistra mižnarodnych adnosin (Kałumbijski ŭniviersitet) i bakałaŭra historyi (Piensilvanski ŭniviersitet). Da dypłamatyčnaj słužby byŭ vałancioram «Korpusa miru» va Ukrainie. Vałodaje ruskaj, ukrainskaj i armianskaj movami.

Jašče da aficyjnaha abviaščeńnia pra pryznačeńnie Krejdler sustrakaŭsia z Ałanam Roja — hramadzianinam Estonii, jakoha vyzvalili ź biełaruskaj turmy pry ŭdziele ZŠA. Roja i jašče niekalki palitviaźniaŭ byli vyviezieny z krainy 21 červienia.

Raniej pavieranym byŭ Piter Kaŭfman, jon pracavaŭ ź Vilni, dzie znachodzicca Ofis Śviatłany Cichanoŭskaj.

Pry adsutnaści pasła časovy pavierany ŭ spravach adkazvaje za pradstaŭleńnie ZŠA ŭ Respublicy Biełaruś, praviadzieńnie źniešniaj palityki ZŠA, a taksama za kiraŭnictva, kaardynacyju i kantrol za piersanałam pasolstva, jaki znachodzicca ŭ jaho padnačaleńni. 

Kamientary da artykuła