ЗША прызначылі новага часовага паверанага ў Беларусі

У ліпені 2025 года ў Беларусь прызначылі новага часовага паверанага ў справах ЗША — Майкла Крэйдлера. Пра гэта паведамляецца на сайце амерыканскай дыпламатычнай місіі, якая цяпер афіцыйна працуе не ў Мінску.

Майкл Крэйдлер. Фота: by.usembassy.gov

Да новага прызначэння Крэйдлер працаваў у Дзяржаўным дэпартаменце ЗША ў сферы прэсы і публічнай дыпламатыі па Еўропе і Еўразіі, а раней — у аддзеле па справах Цэнтральнай Еўропы. Ён таксама займаў дыпламатычныя пасады ва Украіне, Пакістане, Кыргызстане, Косаве і Арменіі.

Мае ступень магістра міжнародных адносін (Калумбійскі ўніверсітэт) і бакалаўра гісторыі (Пенсільванскі ўніверсітэт). Да дыпламатычнай службы быў валанцёрам «Корпуса міру» ва Украіне. Валодае рускай, украінскай і армянскай мовамі.

Яшчэ да афіцыйнага абвяшчэння пра прызначэнне Крэйдлер сустракаўся з Аланам Роя — грамадзянінам Эстоніі, якога вызвалілі з беларускай турмы пры ўдзеле ЗША. Роя і яшчэ некалькі палітвязняў былі вывезены з краіны 21 чэрвеня.

Раней павераным быў Пітэр Каўфман, ён працаваў з Вільні, дзе знаходзіцца Офіс Святланы Ціханоўскай.

Пры адсутнасці пасла часовы павераны ў справах адказвае за прадстаўленне ЗША ў Рэспубліцы Беларусь, правядзенне знешняй палітыкі ЗША, а таксама за кіраўніцтва, каардынацыю і кантроль за персаналам пасольства, які знаходзіцца ў яго падначаленні. 

Каментары да артыкула