U Babrujsku znosiać dom rabina — adzin z najpryhažejšych draŭlanych damoŭ horada
Pavodle zaćvierdžanaha hienieralnaha płana horada dom źjaŭlaŭsia kaštoŭnaj draŭlanaj zabudovaj.
Dom pa vulicy Karła Libkniechta, 57 adzin z najbolš bahata dekaravanych i dobra zachavanych draŭlanych damoŭ u Babrujsku. Fota: komkur.info.
Pra znos doma pa vulicy Karła Libkniechta, 57 paviedamiŭ partał komkur.info.
Dom byŭ uźviedzieny jašče da revalucyi na tahačasnaj Stałypinskaj vulicy. Susiedni budynak zanalnaha dziaržaŭnaha archiva byŭ pabudavany na reštkach byłoj sinahohi, tamu najbolš vierahodna, što hety raskošny dom pobač naležaŭ siamji rabina.
Znos doma pa vulicy Karła Libkniechta, 57. Fota: komkur.info.
Vuhłavy miezanin i zašklonaja vieranda — usio ŭ vydatnym stanie. Fota: komkur.info.
Dychtoŭny dom mieŭ vuhłavy dvarovy miezanin, źjaŭleńnie jakoha nie vielmi zrazumiełaje — naprošvajecca dumka pra suku, impravizavany šacior, u jakim pravaviernyja iŭdziei pavinny ździajśniać trapiezu, a ŭ dobraje nadvorje i načavać, u čas adznačeńnia Śviata šatroŭ (Sukota).
Tonkaja skraznaja raźba karon akonnych lištvaŭ. Fota: komkur.info.
Dom dajšoŭ da našaha času ŭ nadzvyčajna dobrym stanie, bieź pierabudoŭ: zachavałasia zašklonaja vieranda z dvara, dekor z raźbianymi padzorami, lištvy z tonka vykananymi karonami, dvajnyja dźviery ź fihurnymi filonhami i nakładnymi elemientami, składany kavany kazyrok nad uvachodam — ničoha padobnaha bolš u horadzie niama.
Znos doma pa vulicy Karła Libkniechta, 57. Fota: komkur.info.
Razburany miezanin doma. Vid z boku dvara. Fota: komkur.info.
Kali nie brać da ŭvahi znakamity asabniak kupčychi Kacnielson, jaki byŭ vykanany pa prajekcie prafiesijnaha architektara, to dom pa vulicy Karła Libkniechta, 57 — najlepšy ŭzor žyłoj draŭlanaj narodnaj architektury ŭ horadzie, a moža navat va ŭsioj Mahiloŭskaj vobłaści.
Frahmient kavanaha kazyrka. Fota: komkur.info.
Frahmient kavanaha kazyrka. Fota: komkur.info.
Jak adznačaje telehram-kanał «Spadčyna», budynak byŭ abaznačany jak kaštoŭnaja draŭlanaja zabudova na historyka-architekturnym apornym płanie horada — častcy hienieralnaha płana Babrujska, jakim vyznačajecca ŭsia kaštoŭnaja zabudova.
Tym nie mienš aficyjnaha achoŭnaha statusu budynak tak i nie atrymaŭ, a pierad znosam ni miascovyja ŭłady, ni krajaznaŭčy muziej nie parupilisia pra toje, kab źniać z doma i zachavać častku draŭlanaha dekoru i kazyrok, jak robiać u Mahilovie i Homieli, dzie situacyja z zachavańniem draŭlanaha dojlidstva taksama katastrafičnaja.
Uvachod u dom z bahata dekaravanymi dźviaryma i kavanym kazyrkom. Fota: telehram-kanał «Spadčyna»