Na konkursie ŭ Italii pieramoh malunak krejdaj u honar abraza ŭ biełaruskim Budsłavie. Aŭtarka — mieksikanka

U italjanskim miastečku Hracyje-dzi-Kurtatone ŭ pravincyi Mantuja na tradycyjnym konkursie malunkaŭ krejdaj na asfalcie ŭ 2025 hodzie pryzioram stała praca, pryśviečanaja Budsłaŭskaj ikonie Božaj Maci, piša sajt «Biełaruś i mir».

Mieksikanka Alba Rosa Amierskua sa svajoj pracaj. Fota: arhanizatary

U spabornictvach pryniali ŭdzieł 118 vuličnych mastakoŭ, u asnoŭnym italjancaŭ, ale 28 ź ich byli haściami ź inšych krain — ZŠA, Mieksiki, Kanady, Japonii, Ekvadora, Parahvaja, Sierbii, Hiermanii, Niderłandaŭ i inšych.

Jany pavinny byli za paŭtara dnia, z 07.00 čaćviarha 14 žniŭnia da 16.00 piatnicy 15 žniŭnia stvaryć kalarovymi krejdami na asfaltavym pakryćci dvara miascovaj baziliki Najśviaciejšaj Panny Maryi malunki na temu «Madonny z usiaho śvietu».

U toj ža viečar piatnicy, uličvajučy ŭ tym liku niedaŭhaviečnaść rabot, žury — mastactvaznaŭcy, śviatary, žurnalisty i inšyja ekśpierty na čale z historykam Džardana Bruna Huery — vybrali pieramožcaŭ u troch katehoryjach.

Na cyrymonii ŭznaharodžańnia pieramožcaŭ konkursu. Fota: arhanizatary

U katehoryi Maestri Madonnari najlepšaj pryznali krejdavuju karcinu «Madonna Aachaki (Mieksika)» italjanki Džulii Mandzani, u katehoryi Madonnari Qualificati — «Madonna z baziliki ŭ Tyndary (Italija)» jaje siastry Aliče Mandzani.

I narešcie, u katehoryi Madonnari Semplici pieršaje miesca prysudzili pracy pad nazvaj «Ukaranavanaja Madonna z Budsłaŭskaha kaścioła (Biełaruś)». Jaje aŭtarkaj stała mieksikanka Alba Rosa Amierskua.

Jak rastłumačyli ŭ žury, «malunak, pryśviečany abrazu, šanavanamu ŭ słavianskich krainach, paśpiachova spałučaje piaščotu Boskaha maciarynstva z pačućciovaściu, charakternaj dla łacinaamierykanskaj mastackaj tradycyi».

Pry hetym praca mieksikanki nie źjaŭlajecca kopijaj viadomaj biełaruskaj śviatyni — adnoj z najbolš važnych dla katalikoŭ našaj krainy vobrazaŭ Baharodzicy. Jana chutčej stvoranaja pa matyvach Budsłaŭskaha abraza.

Rabota, jakaja pieramahła ŭ katehoryi Maestri Madonnari. Fota: arhanizatary

Vyjavy Panny Maryi i Isusa azdoblenyja radkami sa słavianskich litar, jakija nie składvajucca ŭ słovy i jakija majuć asablivaści, charakternyja dla tvoraŭ štučnaha intelektu. Mahčyma, mastačka źviartałasia da jaho dapamohi.

Što za konkurs

U Hracyje-dzi-Kurtatone štohod adznačajecca staradaŭniaje śviata Fiera delle Grazie, nazvu jakoha možna pierakłaści jak «Kirmaš u Hracyje» ci jak «Kirmaš Božaj łaski». Časam jaho zasnavańnia ličycca 1425 hod. Heta značyć, sioleta adznačałasia 600-hodździe.

Nieadjemnaj častkaj kirmašu ŭ naš čas staŭ Nacyjanalny forum madanary, jaki prachodziŭ ciapier užo ŭ 51-y raz. Madanary — tak nazyvajucca mastaki, jakija malujuć na asfalcie. Hety vid narodnaha stryt-arta ŭ Italii maje hłybokuju historyju

.

Rabota, jakaja pieramahła ŭ katehoryi Madonnari Qualificati. Fota: arhanizatary

Z XVI stahodździa padčas śviataŭ žyvapiscy stvarali na vulicach malunki na relihijnyja matyvy, u asnoŭnym — Madonnu z maleńkim Isusam na rukach. Malavali piłavińniem, roznakalarovym piaskom i pialostkami kvietak. Ciapier heta robiać u asnoŭnym krejdaj.

Na forumie madanary ŭ Hracyje-dzi-Kurtatone mastakam kožny raz zvyčajna dajecca niejkaja tema, i za sutki ź liškam jany pieratvarajuć dvor miascovaj carkvy Najśviaciejšaj Panny Maryi ŭ dzivosnuju vystavu pad adkrytym niebam.

Naprykład, u 2024 hodzie majstry vuličnaha žyvapisu stvarali halereju rabot, pryśviečanuju «Boskaj kamiedyi» Dante Alihjery. A ŭ 2023 hodzie asnoŭnaj temaj byŭ ruch da miru i siabroŭstva pamiž narodami.

Tak vyhladaje dvor carkvy ŭ Hracyje-dzi-Kurtatone padčas konkursu. Fota: arhanizatary

Usio adbyvajecca vielmi surjozna. Naprykład, mierapryjemstva pačynajecca z abradu aśviačeńnia krejdaŭ i błasłavieńnia udzielnikaŭ biskupam Mantui. A pahladzieć na tvorčaść źjazdžajucca tysiačy turystaŭ i pałomnikaŭ.

Karciny, što zrazumieła, pražyvajuć vielmi niadoŭhaje žyćcio — bačyć ich možna faktyčna tolki da pieršaha vialikaha daždžu. Adnak tvory fatahrafujuć, zachoŭvajučy dla naščadkaŭ. Repradukcyi zachoŭvajuć u miascovym muziei madanary i časta vystaŭlajuć na vulicach.

Kamientary da artykuła