U italjanskaj Bałońni biełarusu zabaranili byvać u centry horada

U italjanskim horadzie Bałońnia palicyja pryniała rašeńnie zabaranić na dva hady źjaŭlacca ŭ centry horada dvum udzielnikam bojki — 32-hadovamu biełarusu i 34-hadovamu italjancu, piša «Biełaruś i mir».

Vid na płošču Pjaca Madžory. Fota: facebook.com/comunebologna

Incydent adbyŭsia 18 žniŭnia ŭ histaryčnym centry Bałońni — na hałoŭnaj płoščy Pjaca Madžory, kala apteki pad arkadami pałaca d'Akkursia. U bojcy ŭdzielničali kala dziesiaci biazdomnych, jakija ŭžo amal hod načavali i pravodzili čas u hetym rajonie, badziajučysia pamiž budynkami meryi, płoščaj Pjaceta Huacałoka i pałacam Re Enca.

U toj dzień svarka chutka pierarasła ŭ bojku, padčas jakoj biezdomnyja kidalisia adzin u adnaho šklanymi butelkami. U vyniku dvuch mužčyn — biełarusa i italjanca — palicyja pryznała «niebiaśpiečnymi», tym bolš što abodva ŭžo mieli sudzimaści za rabavańni, pahrozy i naniasieńnie cialesnych paškodžańniaŭ.

Načalnik palicyi vydaŭ rasparadžeńnie DACUR (divieto d'accesso alle aree urbane), pavodle jakoha im zabaroniena naviedvać centralnuju častku horada.

Cikava, što litaralna za niekalki dzion da hetaha, u tym samym miescy i taksama ŭdzień, adbyŭsia padobny incydent: dvoje biazdomnych pabilisia, i adzin pahražaŭ druhomu składnym nažom. Karabiniery paśla prybyćcia zatrymali tolki adnaho ŭdzielnika, jaki dobraachvotna addaŭ nož, a druhi ŭciok.

Miascovyja žychary i ŭładalniki kram užo daŭno skardziacca na prablemu: kala 15 biazdomnych pastajanna znachodziacca ŭ centry Bałońni, i situacyja nie vyrašajecca. Ludzi chočuć bolšaj biaśpieki i bolšaj prysutnaści palicyi na vulicach. U toj ža čas, na ich dumku, patrebna i kompleksnaja praca — miery pa resacyjalizacyi, dapamoha i padtrymka dla tych, chto apynuŭsia ŭ ciažkaj situacyi.

Kamientary da artykuła