Prapaleścinskija pratesty zryvajuć adnu z najbujniejšych viełahonak śvietu
U Ispanii pad pahrozaj zryvu apynułasia «Vuelta» — adna z troch najbujniejšych viełahonak śvietu. Pryčynaj stali masavyja akcyi prapaleścinskich aktyvistaŭ, jakija patrabujuć źniać z turniru kamandu Israel Premier Tech. Ich dziejańni ŭžo pryviali da surjoznych nastupstvaŭ dla sportu. Adnak kamanda nie źbirajecca pakidać honku.
Prapaleścinskija pratestoŭcy padčas 16-ha etapa viełahonki «Vuelta». 9 vieraśnia 2025 hoda. Fota: Tim de Waele / Getty Images
Izrailska-paleścinski kanflikt vyjšaŭ daloka za hieahrafičnyja miežy. Ciapier jon napramuju zakranuŭ spartyŭnyja spabornictvy. Pad pahrozaj zryvu, jak piša Sports.ru, apynułasia adna z troch najbujniejšych viełahonak śvietu «Vuelta», jakaja prachodzić u Ispanii.
U vyniku ahresiŭnych dziejańniaŭ pratestoŭcaŭ, jakija całkam pierakryli trasu, arhanizataram daviałosia na 14 kiłamietraŭ skaracić praciahłaść 16-ha etapu.
Na inšych adrezkach honki jany metanakiravana tarmazili kamandu Israel Premier Tech, a ich dziejańni pryvodzili da niebiaśpiečnych padzieńniaŭ inšych spartsmienaŭ.
Tak, ispaniec Chavi Roma z kamandy Movistar, jaki pretendavaŭ na pieramohu na 15-m etapie, upaŭ na chutkaści 50 km/h paśla taho, jak pierad im na trasu vyskačyŭ manifiestant. Honščyk atrymaŭ traŭmu i byŭ vymušany vyjści z honki.
Takija incydenty adbyvalisia i na inšych prestyžnych honkach, jak «Tur de Frans» i «Džyra dJItalija», ale ŭ Ispanii, dzie va ŭładzie znachodzicca Sacyjalistyčnaja partyja, pratesty dasiahnuli apahieju. Cisk na kamandu akazvajuć navat na aficyjnym uzroŭni: pradstaŭniki rehijona Asturyja admovilisia prysutničać na mierapryjemstvach z udziełam izrailcian.
Patavaja situacyja z kamandaj Israel Premier Tech
Hałoŭnaje patrabavańnie aktyvistaŭ — źniać z honki kamandu Israel Premier Tech. Adnak tut skłałasia jurydyčnaja pastka.
Arhanizatary «Vuelty» adkazvajuć, što nie majuć na źniaćcie kamandy prava. Kamanda zarabiła dastatkova punktaŭ u rejtynhu Mižnarodnaha sajuza viełasipiedystaŭ (UCI), kab aŭtamatyčna atrymlivać zaprašeńni na top-honki. Admović im — značyć parušyć rehłamient.
UCI taksama zajaŭlaje, što nie maje padstaŭ dla źniaćcia kamandy. Vydadzienaja joj licenzija dziejničaje da kanca 2025-ha. Pakul kamanda nie parušaje pravił, adabrać licenziju ci prymusić źmianić nazvu niemahčyma.
Prapaleścinskija pratestoŭcy. 9 vieraśnia 2025 hoda. Fota: Adrian Irago / Europa Press via Getty Images
Sama kamanda vychodzić z honki nie źbirajecca. I kab zrazumieć jaje pazicyju, varta viedać, što Israel Premier Tech — heta nie zbornaja Izraila, a pryvatny prajekt, jaki finansujecca nie ź dziaržaŭnaha biudžetu.
Jaho saŭładalnik — kanadska-izrailski biźniesmien Silvan Adams, jaki bačyć svajoj misijaj prasoŭvańnie pazityŭnaha imidžu Izraila ŭ śviecie praz sport. Dla jaho źniaćcie kamandy pad ciskam pratestoŭcaŭ, jakich jon nazvaŭ «terarystami», było b ideałahičnym paražeńniem.
Bolš za toje, sychod z «Vuelty» aznačaŭ by samaźniščeńnie, bo pratesty praciahnucca i na inšych spabornictvach. Spartyŭny dyrektar kamandy taksama adznačyŭ, što ich źniaćcie stvoryć niebiaśpiečny precedent.
U UCI, jak adznačajuć žurnalisty, bolš padstaŭ, kab pryčapicca da kamandaŭ UAE (AAE), Bahrain (Bachrejn) ci Astana (Kazachstan), jakija naŭprost finansujucca dziaržavami.
Dyrektar «Vuelty» Chaŭjer Hiljen zajaviŭ, što honka praciahniecca, niahledziačy ni na što.
Adnak kamanda pajšła na nievialiki kampramis i paśla 11-ha etapu prybrała słova «Israel» sa svajoj formy. Praŭda, heta nie spyniła pratesty, a, mahčyma, tolki bolš razzłavała aktyvistaŭ, asabliva paśla taho, jak premjer-ministr Izraila Bińjamin Nietańjachu publična padtrymaŭ kamandu.
Udzielniki kamandy Israel Premier Tech u novaj formie.
Pa čutkach, z 2026 hoda kamanda moža źmianić nazvu na Premier Tech, kab paźbiehnuć dalejšych kanfliktaŭ. Ale pakul dziejničaje ciapierašniaja licenzija, usie baki zastajucca zakładnikami situacyi, dzie sport apynuŭsia na pieradavoj palityčnaha kanfliktu.
Čytajcie taksama:
Viełahonka na ledniku ŭ Francyi pieratvaryłasia ŭ žudasnaje miesiva
Tadej Pahačar: viełavunderkind z maleńkaj słavianskaj krainy, jaki nie maje sabie roŭnych