Kolki zastavałasia siadzieć departavanym palitviaźniam?

«Ja adbyła ŭvieś termin, a mianie jašče vysłali», — tak žurnalistka i byłaja palitźniavolenaja Łarysa Ščyrakova kaža pra svaju departacyju. I sapraŭdy, žančynie zastavałasia da vyzvaleńnia niekalki miesiacaŭ. Šmat chto ź viaźniaŭ, vyviezienych u Litvu 11 vieraśnia, taksama adbyŭ bolšuju častku terminu abo ŭvohule musiŭ vychodzić na volu ciaham miesiacaŭ.

Naprykład, pravaabaroncam nieviadoma, kali była zatrymanaja hramadzianka Litvy Alena Ramanaŭskienie, asudžanaja na 6 hadoŭ źniavoleńnia pa art. 357 (ahienturnaja dziejnaść). Taksama nieviadomaja data zatrymańnia bieraściejskaj žurnalistki Aleny Cimaščuk, jakuju ŭ červieni 2024‑ha prysudzili da 5 hadoŭ źniavoleńnia pa niekalkich artykułach, u tym liku pa art. 361 (stvareńnie ekstremisckaha farmavańnia i ŭdzieł u im).

Nie pa ŭsich palitviaźniach, jakija vyjšli na svabodu 11 vieraśnia 2025 hoda, jość dastatkova infarmacyi, kab vyličyć daty zakančeńnia ich terminaŭ. U niekatorych vypadkach pravaabaroncy nie viedajuć datu zatrymańnia. Pra inšych moža być błytanina z dataj, kali ich prysud nabyŭ moc.

Tym nie mienš my naličyli kala dziesiaci palitviaźniaŭ, jakija vyzvalilisia b da kanca hoda.

Źmicier Daškievič musiŭ vyjści ŭžo ŭ pieršaj pałovie kastryčnika. Ź inšaha boku, Daškieviču dvojčy padaŭžali termin pa artykule 411 (złosnaje niepadparadkavańnie administracyi). Tamu nieviadoma, ci nie zdaryłasia b heta jašče raz.

Praź niekalki miesiacaŭ pavinna była vyjści na svabodu Łarysa Ščyrakova, homielskaja žurnalistka. Jaje asudzili na try z pałovaj hady za kratami pa artykułach 361 i 369 (sadziejničańnie ekstremisckaj dziejnaści i dyskredytacyja Biełarusi).

U pieršyja hadziny paśla vyzvaleńnia i departacyi jana ledź strymlivała ślozy:

«Ja dumaju, što heta vielmi žorstka, što ja realna adbyła termin try hady, a ciapier mianie jašče vysłali. A ŭ mianie tut niama ni doma, ni rodnych. Kałonija na Antoškina znachodzicca ŭ Homieli. Varta było b prosta adčynić bramu i mianie vypuścić».

Prykładna ŭ kancy kastryčnika musiŭ by vyjści na volu prafsajuzny dziejač Alaksandr Jarašuk, u listapadzie skončylisia b terminy Maksima Viniarskaha, Ihara Ciapciejeva i Illi Dubskaha. U śniežni skančvalisia terminy Dźmitryja Kazłova, Jaŭhiena Siamionava, Hleba Hładkoŭskaha, Vitala Bandaruka, Uładzimira Mackieviča.

U studzieni 2026‑ha vyzvalilisia b «pa zvanku» Siarhiej Sparyš, Andrej Kryłoŭ, Pavieł Nikicienka, Jakaŭ Šafarenka, Andrej Chvieskaviec, Viktar Ułasienka i Cimur Ryzapur.

U sakaviku 2026‑ha skončylisia b terminy ŭ Jaŭhiena Mierkisa i Andreja Ściepańkova, u krasaviku — u Iryny Słaŭnikavaj. 

Šmat chto z vyzvalenych biełarusaŭ adsiedzieŭ bolšuju častku terminu. U žniŭni 2026‑ha skančvaŭsia termin u Śviatasłava Šubiča, u vieraśni — u Paŭła Vinahradava i Paŭła Padabieda.

Takim čynam, kala 25 palitviaźniam — bolšaści ad vyzvalenych biełarusaŭ — zastavałasia pravieści za kratami mienš za hod.

Vosieńniu 2026‑ha taksama musiŭ vyjści na volu Alaksandr Mancevič.

Čaćviora vyzvalenych, kali b nie amierykancy, vyjšli b na svabodu ŭ 2027‑m hodzie. Heta Viačasłaŭ Łazaraŭ, Jaŭhien Afnahiel, Andrej Vojnič i Mikałaj Chiła.

Niekatorym palitviaźniam zastavałasia adbyć bolš za dva hady terminu. Heta, naprykład, Pavieł Mažejka, u jakoha termin musiŭ skončycca ŭ lutym 2028‑ha hoda, ci Dźmitryj Kučuk, jaki vyjšaŭ by ŭ žniŭni 2029-ha.

U 2030‑m svabodu pabačyli b Hienadź Fiadynič i Julija Fienier.

Niekatorym z vyzvalenych daviałosia b čakać svabody značna daŭžej.

Voźmiem, naprykład, Halinu Dzierbyš. Piensijanierka z Hrodzienskaha rajona atrymała 20 hadoŭ źniavoleńnia, jaje termin skančvaŭsia b u 2039-m. Halinie ŭžo 64 hady, jana maje invalidnaść druhoj hrupy i prablemy z sercam. Ci dažyła b jana da svajho vyzvaleńnia?

Inšy vyzvaleny viazień ź vielizarnym terminam — Ihar Łosik. Žurnalist atrymaŭ 15 hadoŭ źniavoleńnia, ale za košt doŭhaha znachodžańnia ŭ SIZA (jon pravioŭ tam amal 2 hady) termin skaraciŭsia na niekalki miesiacaŭ. I ŭsio roŭna, kali b nie ciapierašniaje vyzvaleńnie, Łosik apynuŭsia b na svabodzie tolki prykładna ŭ červieni 2034‑ha hoda.

Termin źniavoleńnia Mikałaja Statkieviča pavinien skončycca prykładna ŭ mai 2034-ha.

Kamientary da artykuła