Ziankovič nazvaŭ imia pravakatara, ź jakoha pačałasia sprava zmoŭščykaŭ suprać Łukašenki. Jaho karjera ciapier pajšła ŭharu
Jurasia Ziankoviča i Alaksandra Fiadutu aryštavali ŭ 2021‑m u Maskvie paśla sustrečy z pałkoŭnikam z Hienštaba Ivanam Žuraŭskim, na jakim abmiarkoŭvałasia paŭstańnie siłavikoŭ. Ale jak Ziankovič, amierykanski advakat, uvohule paznajomiŭsia z Žuraŭskim? Akazvajecca, byŭ jašče i «pieršy kantakt», jaki nie zachacieŭ śviacić svaje suviazi sa śpiecsłužbami, nie źjaviŭsia ŭ sud i zastaŭsia nieviadomym. A nieŭzabavie paśla zakančeńnia apieracyi atrymaŭ pavyšeńnie ŭ zvańni i pasadzie.
Jaŭhien Baranoŭski — na toj momant 33‑hadovy namieśnik načalnika ŭpraŭleńnia mižnarodnaha supracoŭnictva ŭ Ministerstvie pa nadzvyčajnych situacyjach. Fota: instahram
«Sprava zmoŭščykaŭ», jakaja razharnułasia viasnoj 2021-ha, vyłučajecca sapraŭdy nietryvijalnym siužetam. Apieratyŭniki prymusili pavieryć vopytnych palitykaŭ u isnavańnie niejkich arhanizavanych i łajalnych pratestu bataljonaŭ, jakija hatovyja zaniać Minsk i šukajuć tolki palityčnych lidaraŭ, jakija b stali ŭ avanhardzie novaha palityčnaha pracesu.
U vyniku piać čałaviek — centralnyja fihury heta Juraś Ziankovič, Alaksandr Fiaduta i Ryhor Kastusioŭ, — byli aryštavany pa abvinavačvańni ŭ zmovie z metaj zachopu ŭłady. Pieršych dvuch zatrymali ŭ Maskvie, kudy jany pajechali abmiarkoŭvać z aficerami błakiroŭku Minska i paradak internavańnia centralnych fihur režymu ŭ pieršyja hadziny paŭstańnia.
Fihuranty pryznali vinu, atrymali svaje 10‑11 hadoŭ kałonii, i sprava była zabyta. Z časam Kastusioŭ ź Ziankovičam vyjšli pa pamiłavańni, Fiaduta jašče siadzić.
Taksama ŭ pracesie hramadstvu staŭ viadomy aficer Hienštaba Ivan Žuraŭski, jaki «vioŭ» Ziankoviča, fiksujučy na videa pieramovy, jakija potym stali asnovaj kryminalnaj spravy.
Pałkoŭnik Žuraŭski (zablurany na kadrach prapahandy) ź Jurasiom Ziankovičam, achviaraj pravakacyi. Fota: ANT, AIS Pašpart
Ale ŭsio ž jak Ziankovič paznajomiŭsia z Žuraŭskim? Čamu vieryŭ jamu? Jakija jašče byli pramiežkavyja źviony ŭ hetaj historyi? Chto jašče ŭdzielničaŭ u pravakacyi?
«Naša Niva» zadała hetyja pytańni Ziankoviču i atrymała ŭ adkaz jašče adno proźvišča, daviedałasia asobu aficera-pravakatara, ź jakoha ŭ Biełarusi i pačałasia «sprava zmoŭščykaŭ».
38‑hadovy supracoŭnik MNS Jaŭhien Baranoŭski. Fota: BiełTA
Juraś Ziankovič raskazaŭ, što adzin daŭno znajomy jamu ŭkrainski juryst, čyjo imia jon pakul nie choča nazyvać, letam 2020-ha, užo paśla vybaraŭ, paraiŭ jamu svajho znajomaha ŭ Minsku — maładoha aficera z demakratyčnymi pohladami, — jaki moh by dapamahčy Ziankoviču ŭ jahonaj palityčnaj baraćbie.
Ziankovič tady byŭ u Biełarusi i pryniaŭ prapanovu. Jon atrymaŭ kantakty i asabista paznajomiŭsia sa svabodalubivym padpałkoŭnikam Jaŭhienam Baranoŭskim, čyjo imia na toj momant jašče nie było šyrokaviadoma.
Heta ciapier (z maja 2022-ha) Baranoŭski — pres-sakratar Ministerstva pa nadzvyčajnych situacyjach, a tady jon byŭ 33‑hadovym namieśnikam načalnika ŭpraŭleńnia mižnarodnaha supracoŭnictva ŭ MNS.
U Biełarusi Ziankovič sustreŭsia z Baranoŭskim try razy. Pieršy raz byŭ u žniŭni 2020-ha.
«Baranoŭski skazaŭ, što rychtujecca vychodzić z adpačynku i nie viedaje, čaho čakać i na što spadziavacca z ulikam situacyi na vulicach. Druhi raz sustrakalisia, kali jon užo nibyta vyjšaŭ na rabotu, jon kazaŭ, što ŭvieś aparat razhubleny, nie viedajuć, što rabić i kudy ruchacca. Jon pacikaviŭsia, što ja mahu paraić», — apisaŭ Ziankovič abstaviny hetych sustreč.
Na pytańnie aficera Ziankovič parazvažaŭ, što pieramoža siła i što siłaviki-patryjoty pavinny navieści kanstytucyjny ład u krainie.
Baranoŭski ŭ adkaz pačaŭ fiłasofstvavać i aburacca fihuraj Śviatłany Cichanoŭskaj, jakuju, maŭlaŭ, składana ŭjavić na pasadzie hałoŭnakamandujučaha. Ziankovič supakojvaŭ taho, što Cichanoŭskaja — tolki pierachodnaja fihura, a chto budzie kamandavać, vyrašać novyja vybary.
«Tady pačalisia bolš kankretnyja razmovy. Chto, na maju dumku, pavinien heta zrabić? Ja adkazaŭ, što najlepš, kali heta zrobić vojska jak najbolš patryjatyčnaja struktura, jakaja karystajecca bolšym davieram nasielnictva. Baranoŭski adkazaŭ, što ŭ jaho niama znajomych u vojsku, ale jon pašukaje», — kaža Ziankovič.
Na treciaj, apošniaj vočnaj sustrečy z ahientam, toj pytaŭsia ŭ Ziankoviča ŭžo takija rečy: «Chto jon usio ž taki? Jakija za im stajać siły? Nakolki jon upłyvovy?»
«Mnie takija pytańni padalisia naturalnymi, ja na ich adkazvaŭ, krychu nakidvajučy na siabie puchu, ale nie mocna», — zapeŭnivaje Ziankovič.
Naprykancy razmovy, pierakanaŭšysia, što razmaŭlaje z surjoznym čałaviekam, Baranoŭski skazaŭ, što pieradaść kantakt Ziankoviča znajomamu aficeru Hienštaba, jaki taksama zacikaŭleny ŭ spravie revalucyi.
Hetym aficeram byŭ pałkoŭnik Ivan Žuraŭski, jaki pad vyhladam spačuvajučaha i ŭpłyvovaha revalucyjaniera davioŭ raspracoŭku Ziankoviča i kampanii da łahičnaha finała.
«Zvodziačy mianie z aficeram Hienštaba, Baranoŭski skazaŭ, što chacieŭ by, kab ad hetaha momantu jaho imia nidzie nie fihuravała. Maŭlaŭ, svoj hramadzianski abaviazak jon na hetym vykanaŭ», — uspaminaje Ziankovič.
Baranoŭski ŭ spravie bolš nie fihuravaŭ. Na sud Baranoŭski nie źjaviŭsia, chacia Ziankovič ź Fiadutam chadajničali ab vykliku.
Sudździa nie zadavoliŭ chadajnictva, tamu što pryčyna adsutnaści — zamiežnaja kamandziroŭka, — była pryznana pavažlivaj.
***
Pałkoŭnik Jaŭhien Uładzimiravič Baranoŭski naradziŭsia 15 lutaha 1987 u Lidzie. Baćka — vajskovy piensijanier, maci — uradženka Rasii, infarmacyi pra jaje miescy pracy niama.
Vučyŭsia ŭ lidskaj škole №4, pa zakančeńni pastupiŭ u Kamandna-inžynierny instytut MNS pa śpiecyjalnaści «Papiaredžańnie i likvidacyja nadzvyčajnych situacyj» i skončyŭ jaho ŭ 2009 hodzie. Słužbu pačaŭ na pasadzie starejšaha inśpiektara ŭpraŭleńnia mižnarodnaha supracoŭnictva MNS.
U 2015 hodzie skončyŭ Akademiju kiravańnia pa śpiecyjalnaści «Mižnarodnyja adnosiny». Braŭ udzieł u mižnarodnych profilnych pasiadžeńniach za miažoj u składzie biełaruskaj delehacyi.
Na momant raspracoŭki Jurasia Ziankoviča vosieńniu 2020‑ha zajmaŭ pasadu namieśnika kiraŭnika ŭpraŭleńnia mižnarodnaha supracoŭnictva MNS, mieŭ zvańnie padpałkoŭnika.
U mai 2022‑ha staŭ pres-sakratarom MNS, zamianiŭšy pamierłaha Vitala Navickaha. Da hetaha času atrymaŭ zvańnie pałkoŭnika.
Maje dvuch dziaciej.