U Litvie ministra kultury pastaviła ŭ tupik pytańnie «Čyj Krym?» Heta kaštavała jamu pasady

Zusim niadaŭna pryznačany na pasadu ministra kultury pa kvocie papulisckaj partyi «Niomanskaja zara» Ihnatas Adamavičus na samaj pieršaj svajoj pres-kanfierencyi spatyknuŭsia na pytańni, jakoje źjaŭlajecca adnym z klučavych u ankietach, jakija apošnija hady musić zapaŭniać kožny inšaziemiec, kali choča pretendavać na žyćcio i pracu i Litvie.

Ihnas Adamavičus

Kali žurnalistka vydańnia lrytas.lt zapytała ŭ Adamavičusa, čyim, na jahonuju dumku, źjaŭlajecca Krym, ministr spačatku sprabavaŭ ad adkazu na pytańnie ŭchilicca, a paśla taho, jak jamu zadali jaho paŭtorna, paprasiŭ nie zakranać hetu temu.

«Heta pravakacyjnyja pytańni, davajcie navat nie budziem da ich padychodzić, bo my ciapier havorym nie pra Ministerstva kultury», — adkazaŭ Adamavičus paśla paŭzy.

«Nie, davajcie nie hulać u hetyja hulni. Razumiejecie, treba… Jość miaža, za jakuju nie varta zachodzić. Voś tut i treba spynicca. Na hetych pytańniach», — skazaŭ ministr.

Takija samyja ciažkaści ŭ Ihnatasa Adamavičusa vyklikaŭ adkaz na pytańnie, što dla jaho jak dla čałavieka i palityka aznačała b pieramoha Ukrainy.

«Napeŭna, lepš za ŭsio heta viedajuć sami ŭkraincy — što dla ich źjaŭlajecca pieramohaj. Nie my. My nie možam zrazumieć ich tak hłyboka, jak jany sami bačać situacyju. Hetak ža, jak my, Litva, uśviadomili svaju pieramohu, kali vyjšli z akupacyi, z-pad pryhniotu i stali svabodnymi, tak i jany pavinny sami vyznačyć svaju pieramohu. Heta ich šlach. Kožny pavinien prajści svoj šlach. My možam tolki dapamahčy, padtrymać. Naša dapamoha moža dapamahčy im znajści hetuju pieramohu. Ale tolki jany mohuć nazvać, jakoj jana pavinna być. Nielha adkazvać za inšaha», — skazaŭ ministr.

Takaja pazicyja, jakaja była ŭspryniataja jak prarasijskaja, vyklikała ŭ Litvie chvalu abureńnia. U vyniku ŭ toj ža samy dzień było abjaŭlena pra adstaŭku ministra. Ciapier «Niomanskaja zara» šukaje novaha kandydata na pasadu ministra kultury.

Suprać pryznačeńnia Adamavičusa ministram litoŭskaja kulturnaja supolnaść aktyŭna vystupała jašče raniej. Na minułym tydni na płoščy la prezidenckaha pałaca prajšła akcyja pratestu — amal tysiača pradstaŭnikoŭ śfiery kultury sabralisia i zapatrabavali, kab ministerstva ŭznačaliŭ kampietentny śpiecyjalist, jaki budzie hodna pradstaŭlać ich intaresy. Taksama suprać pryznačeńnia Adamavičusa raspaŭsiudžvałasia pietycyja, jakuju padpisali dziasiatki tysiač čałaviek. U niadzielu, 5 kastryčnika, kulturnaja supolnaść źbirałasia pravieści papieradžalny strajk. 

Možna mierkavać, što asoba nastupnaha kandydata ŭ ministry budzie taksama vyklikać nieprymańnie, tamu što dziejačy kultury ŭvohule suprać taho, kab ich śfiera addavałasia ŭ ruki pradstaŭnikoŭ partyi «Niomanskaja zara». 

Kamientary da artykuła