Biełaruskija dalnaboi ŭ Jeŭropie: haračaja dyskusija ŭ sacsietkach pra toje, u jakoj krainie jany zarablajuć najbolš i majuć najlepšyja ŭmovy pracy
Niadaŭna «Naša Niva» raskazała pra zarobki biełaruskich dalnabojščykaŭ u Polščy i Hiermanii. Hety materyjał šyroka razyšoŭsia ŭ tyktoku i instahramie i vyklikaŭ ažyŭlenyja abmierkavańni. Mnohija kiroŭcy raskazali, kolki zarablajuć jany i jakija ŭ ich umovy pracy.
«Naša Niva» raskazvała, što mienš za ŭsio atrymlivajuć kiroŭcy busaŭ u Polščy z pravami katehoryi B: ich dzionny zarobak składaje 75 jeŭra. Kali ž katehoryja C, heta značyć, mašyna maje vahu bolš za try z pałovaj tony, to zarobak vyrastaje na 5 jeŭra. A kali hruzavik abstalavany chaładzilnikam, to možna atrymlivać i pa 100 jeŭra za sutki.
Adnak, jak adznačajuć aŭtary, vopytnyja dalnabojščyki, jakija majuć usie nieabchodnyja dakumienty, imknucca šukać pracu ŭ krainach Zachodniaj Jeŭropy. U Hiermanii zarobki pačynajucca sa 120 jeŭra ŭ sutki. Pry hetym apłačvajucca navat vychadnyja, praviedzienyja ŭ rejsie, a viedańnie movy moža jašče bolš pavialičyć zarobak.
Pa słovach aŭtara, u siarednim u Hiermanii vychodzić kala 3 tysiač jeŭra «na ruki» ŭ miesiac, u Polščy — kala 2000.
Pryvodziŭsia prykład biełarusa, jaki pracuje ŭ Hiermanii 5 dzion na tydzień pa 8 hadzin i nie ździajśniaje dalokich pajezdak. Jaho zarobak składaje 115 jeŭra ŭ sutki. Mužčyna žyvie ŭ katedžy ź inšymi kiroŭcami i płacić za heta 200 jeŭra ŭ miesiac. U adroźnieńnie ad Polščy, niamiecki pracadaŭca apłačvaje vodpusk i balničny.
Na videa aktyŭna adhuknulisia karystalniki, jakija, pa ich słovach, sami pracujuć u śfiery hruzapieravozak u Jeŭropie. Jany raskazali, što našmat bolš zarablajuć i ŭ Polščy.
«U Polščy pracuju. Vychadnyja apłačvajucca. Apošni zarobak — 3000 dołaraŭ», — napisaŭ kiroŭca pad adnym z tredaŭ.
«Nie zusim tak. Siaredni zarobak pryblizna zraŭniaŭsia — što ŭ niemcaŭ, što ŭ zamiežnych kiroŭcaŭ. Zarobak składaje pryblizna ad 2800 da 3200 nieta ŭ zaležnaści ad abjomu pracy».
«Siaredni zarobak u Polščy — 90‑-100 jeŭra za dzień. Kolki dzion adpracavaŭ, stolki i zarobak. Biez haścinicy i arendnych kvater. Son u kabinie aŭto i płatnyja parkoŭki — redkaść».
«U Polščy płaciać užo našmat bolš. Kala 3000 — siaredniaja «pa pałacie». Adzinaje pravilnaje [što zhadana ŭ roliku] — zarobak na busy katehoryi B. Taksama ŭsiudy apłačvajucca vychadnyja. Nichto paŭzu za «dziakuj» stajać nie budzie».
Inšy kamientatar zaŭvažaje, što ŭ Polščy zarobki ciapier bolšyja, čym u Litvie. Mužčyna taksama tłumačyć, što ź biełaruskim pašpartam na pracu ŭ Hiermanii ŭładkavacca ciažej — tolki praz pasiarednika.
Adnak nie va ŭsich zarobki takija vysokija. Znajšoŭsia i toj, chto apisaŭ značna bolš surovyja realii:
«Jak dalnaboj skažu. Bolš za 95 jeŭra vy nie atrymajecie. Tamu što vy «mihrys». U katedžy vy žyć nie budziecie pry lubym raskładzie. Tolki ŭ kabinie. Pra 8 hadzin i 5 dzion na tydzień zusim naśmiašyła… Ad 13 da 15 hadzin. Praz tydzień i pa subotach pracavać budziecie».
Dyskusiju praciahnuła zaŭvaha adnaho z karystalnikaŭ, jaki paprasiŭ raskazać nie tolki pra hrošy, ale i pra pobyt: «Apublikujcie, jak charčujucca, dzie śpiać i ź jakim kryminałam sutykajucca».
Na heta jamu iranična paraili ŭdakładnić, ci nie idzie havorka pra ŭmovy ŭ Biełarusi: «Zabylisia dadać «…u Biełarusi da hetaj pracy»».
Adzin z karystalnikaŭ daŭ razhornuty adkaz, paraŭnaŭšy ŭmovy pracy ŭ Biełarusi i ŭ Jeŭropie:
«Mnie 26 hadoŭ, i 5 hadoŭ ja ŭ hetaj [śfiery]. Pačynaŭ z kałhasa vialikaj [Biełarusi] za kapiejki… I pajechaŭ u Jeŭropu. I jak by heta ni hučała, za ludziej nie ličać jakraz-taki ŭ SND… Ty abaviazany, pavinien prajechać 20 000 km+ u miesiac. I heta jak minimum… kab tam niešta zarabić. I im p**** (nie chvaluje — NN), ci spaŭ ty, ci jeŭ… A ŭ Jeŭropie ja voś navat ciapier, u hety voś dzień, papracavaŭ dźvie hadziny — i ŭsio. Na adpačynak… Ale svaje 100 jeŭra ŭ kišeniu pakłaŭ…
Kryminał? (…) Maksimum za ŭvieś čas, što było, — heta tent rezali, a tak i ŭsio. (…) Ježa tut — kožnamu svajo. Ja ŭ «mak» zajazdžaju, ci sam hatuju, ci kava (Polšča, Litva) pa darozie. A nakont spać, jak ja i kazaŭ, što ŭ SND ty ŭvohule nie śpiš. Tabie nie daduć prosta. A tut ja splu jak zabity. Skazaŭ by, što navat lepš, čym doma».
Adnak krytyk nie supakoiŭsia i praciahnuŭ nastup:
«Ty zabyŭsia zhadać pra biaźmiežža na stajancy ŭ kirunku Francyi, toje, što śpiš u kabinie i hatuješ na harełcy ježu. Praca padviarhajecca vialikaj ryzycy, i treba mieć dobraje zdaroŭje».
Na heta jamu adkazaŭ inšy karystalnik:
«Charčujucca jak doma, u duš chodziać kožny dzień na luboj zapraŭcy (u Italii, Francyi biaspłatna, u inšych krainach 3‑-4 jeŭra). Śpiać u mašynach, ciopłych». Mužčyna dadaŭ, što za siem hadoŭ pracy jon ni razu nie sustrakaŭ kryminału, u toj čas jak u Rasii jaho nie brakuje.
Jašče adzin kiroŭca źviarnuŭ uvahu na roźnicu pamiž Jeŭropaj i Rasijaj ź Biełaruśsiu: «Śpiš spakojna na stajancy z adkrytymi dźviaryma, baki biez zamkoŭ, nichto paliva nie kradzie. Tent nie režuć i nie kraduć».
Jość i tyja, chto dobryja hrošy maje i ŭ Rasii.
«Čatyry hady na Jeŭropie pracavaŭ, i načami taksama jeździŭ. Za miesiac na prajekcie Amazon adzin aŭtavoz — 12‑14 tysiač [kiłamietraŭ]. Zarobak — 2200 jeŭra. Viarnuŭsia dachaty i, nie pavieryš, prabieh za miesiac maksimum 14 tysiač, zarobak u minułym miesiacy skłaŭ 236 000 rubloŭ (8700 biełaruskich ci 2500 jeŭra. — NN) + 21 000 rubloŭ (774 biełaruskich ci 223 jeŭra) sutačnyja. Jem u kaviarniach, i sam, zdarajecca, hatuju. Raz na tydzień dadomu zajazdžaju pa darozie».
Pry hetym sam kiroŭca pryznaje, što jahony vypadak, chutčej, vyklučeńnie, i raić inšym «lepš šukać».
Inšy śćviardžaje, što žyvie ŭ Ispanii i «vozić pakunki» na fury (katehoryja CE), pracuje z paniadziełka pa piatnicu pa 5‑-7 hadzin, z 8‑j ranicy da 4‑j hadziny dnia, ale faktyčna zakančvaje pracu raniej. Jaho zarobak składaje 1900 jeŭra za miesiac. «Jeździć daloka navat pa Ispanii niama sensu, bo za heta płaciać nie vielmi dobra», — piša mužčyna i adznačaje, što jon hramadzianin Ispanii.
«A što pieraškadžaje biełaruskim pieravozčykam płacić taki ž zarobak?» — zadajecca pytańniem adzin z karystalnikaŭ.
Pavodle jaho słoŭ, u krainie 90% kiroŭcaŭ na hruzapieravozkach pracujuć «pa-čornamu». Aficyjny zarobak składaje 700 rubloŭ, a astatniaje — «hatoŭkaj u kanviertach» i «jak zachaču».
Jamu tłumačać, što pracavać u Biełarusi inakš niemahčyma: «Adkryj svaju kampaniju i pasprabuj płacić aficyjny [zarobak, pahladziš] Kolki možaš płacić i kolki hatovyja za heta rabić».
Narešcie, častka karystalnikaŭ aburyłasia samoj temaj abmierkavańnia — nie varta ličyć čužyja hrošy, zaroblenyja ciažkaj pracaj.
«A navošta vy ličycie hrošy čužych ludziej, jakija zarablajuć svajoj pracaj? U čym prablema pajści na tuju ž samuju pracu?»
Niekatoryja prapanavali zamiest taho, kab ličyć dachody pracaŭnika, apublikavać dachody «našych ministraŭ, deputataŭ i dyrektaraŭ!»
Čytajcie taksama:
U Biełarusi śćviardžajuć, što pjany dalnabojščyk z Małdovy prachodziŭ biełaruskuju miažu ćviarozym
Pad Urocłavam pjany biełaruski dalnabojščyk paralizavaŭ cełuju trasu