Turčyn zajaviŭ, što Biełaruś i Rasija damovilisia nakont naftapierapracoŭki

Biełaruś i Rasija vyznačylisia z umovami funkcyjanavańnia naftapierapracoŭki na siarednieterminovuju pierśpiektyvu. Pra heta paviedamiŭ žurnalistam premjer-ministr Alaksandr Turčyn.

Mazyrski NPZ. Fota: pres-słužba zavoda

«Litaralna siońnia my zaviaršyli, skažam tak, paŭhadavuju niaprostuju pracu z našymi rasijskimi partniorami pa ŭmovach funkcyjanavańnia hetaj haliny na siarednieterminovuju pierśpiektyvu. Na ŭzajemavyhadnych umovach. Jakija dazvalajuć našym naftapierapracoŭčym zavodam efiektyŭna pracavać», — prainfarmavaŭ jon.

Inšyja padrabiaznaści jon nie nazvaŭ, ale adznačyŭ, što pryniatyja ŭradam miery dali značny ekanamičny efiekt dla ajčynnych pradpryjemstvaŭ, i jon «vyličajecca nie adnoj sotniaj miljonaŭ dołaraŭ».

Turčyn adznačyŭ, što pytańnie pracy haliny razhladałasia taksama ŭ kantekście situacyi na rynku naftapraduktaŭ u susiednich krainach. A situacyja na ŭnutranym rynku z zabieśpiačeńniem naftapraduktami «ŭ nas stabilnaja i nijakich uzrušeńniaŭ prosta nie moža być».

U Rasii z-za atak ukrainskich bieśpiłotnikaŭ na naftapierapracoŭčyja zavody ŭźnikła napružanaja situacyja na rynku aŭtamabilnaha paliva. U niekatorych rehijonach uźnik deficyt paliva, što vymusiła rasijski ŭrad uvieści časovyja abmiežavańni na ich ekspart. Na hetym fonie zamiežnyja i rasijskija ŚMI paviedamili pra rezki rost pastavak naftapraduktaŭ u Rasiju mienavita ź Biełarusi, kab kampiensavać unutrany niedachop.

Kamientary da artykuła