Pradprymalnik kupiŭ za bazavuju budynki z abstalavańniem. Ich u jaho zabrali i jašče dali 2,5 miljona štrafu
U Homielskaj vobłaści viernuty va ŭłasnaść dziaržavy piać pradadzienych z aŭkcyjonu budynkaŭ i bolš za 500 adzinak abstalavańnia. Źvierchu da zabranych budynkaŭ pradprymalnik pavinien dziaržavie 2,5 miljona štrafu, pišuć «Homielskija viedamaści».
Jak raspaviadaje vydańnie, dyrektar adnoj ź firmaŭ u Homielskaj vobłaści nabyŭ u 2021 hodzie kompleks vytvorčych budynkaŭ pa bazavaj canie, a da ich — abstalavańnie na 58 tysiač rubloŭ u rasterminoŭku. Pavodle ŭmoŭ pahadnieńnia, jon musiŭ zapuścić na hetaj bazie vytvorčaść, ale vyrašyŭ zarabić inakš.
Jon fiktyŭna zdaŭ budynki ŭ arendu «siabroŭskamu» pradpryjemstvu, a abstalavańnie razabraŭ i častku jaho pradaŭ za 105 tysiač rubloŭ. Reštu płaciažu pa rasterminoŭcy (25,6 tysiačy rubloŭ) jon unosić nie staŭ.
Pavodle rašeńnia suda, dahavor kupli-prodažu byŭ skasavany, i ŭsia nabytaja majomaść viernuta pradaŭcu.
Akramia taho, na pradprymalnika nakłali štraf u pamiery 2,5 miljona rubloŭ. Abłasny departamient finansavych rasśledavańniaŭ zavioŭ na jaho kryminalnuju spravu.