Francyju nakryła cełaja epidemija rabavańniaŭ muziejaŭ

U paniadziełak u Paryžy abrabavali jašče adzin muziej.

Dom aśviety Deni Dzidro. Wikimedia commons

U paniadziełak, usiaho praź dzień paśla «ŭdaru pa Łuŭry», paciarpieŭ jašče adzin muziej. U «Domie aśviety Deni Dzidro» ŭ horadzie Łanhr na poŭnačy Francyi za adnu noč źnikła amal 2000 załatych i srebranych maniet XVIII stahodździa, piša Bild.

Šmat z hetych maniet unikalnyja. Pavodle papiarednich danych, złačyncy dziejničali prafiesijna — jany vidavočna viedali, što šukali.

Śledčyja kažuć, što heta tendencyja: muziei i kalekcyi ŭ Francyi rabujuć z pačatku vieraśnia.

U siaredzinie kastryčnika paciarpieŭ Muziej Žaka Šyraka na paŭdniovym zachadzie ŭ Saranie — dvojčy ciaham 48 hadzin. Ukradzieny hadzińniki i juvielirnyja vyraby, dypłamatyčnyja padarunki byłomu prezidentu Žaku Šyraku. Škoda pakul nie acenienaja całkam, palicyja viadzie rasśledavańnie.

▫️U vieraśni z Nacyjanalnaha muzieja Adryjena Dziubiuše ŭ Limožy źnikli try kitajskija farforavyja vyraby koštam 6,5 miljona jeŭra, aficyjna kłasifikavanyja jak «nacyjanalnaje bahaćcie».

Praź niekalki dzion z Muzieja pryrodaznaŭstva ŭ Paryžy skrali niekalki samarodkaŭ zołata na 1,5 miljona jeŭra. 24‑hadovuju padazravanuju zatrymali ŭ Barsiełonie, jaje mahčymych saŭdzielnikaŭ šukajuć pa ŭsioj Jeŭropie.

Pakul niezrazumieła, staić za hetaj sieryjaj adna złačynnaja hrupa ci idzie havorka pra supadzieńni i pierajmalnikaŭ. U vypadku rabavańnia Łuŭra śledčyja zychodziać z taho, što za im staić prafiesijna arhanizavanaja banda.

Kamientary da artykuła