Va Uruččy vysiekuć skvier pad pravasłaŭnuju carkvu. Natchnialisia rańniechryścijanskaj architekturaj Ryma
Na skryžavańni vulic Rusijanava i Nikifarava ŭ Minsku płanujuć uźvieści čarhovy pravasłaŭny chram. U adroźnieńnie ad bolšaści sučasnych pravasłaŭnych śviatyniaŭ jaho architektura źviartajecca nie da tradycyj rasijskaha dojlidstva, a da estetyki poźniarymskich maŭzalejaŭ i martyryjaŭ.
Chram Śviatoj Mučanicy Taćciany, jaki chočuć pabudavać na rahu vulic Rusijanava i Nikifarava. Z materyjałaŭ hramadskaha abmierkavańnia
Architekturna-płanirovačnuju kancepcyju novaha chrama vyniesła na abmierkavańnie administracyja Pieršamajskaha rajona Minska.
Zakazčykam vystupaje pravasłaŭny prychod chrama Śviatoj Mučanicy Taćciany. U 2022 hodzie prychod užo sprabavaŭ uźvieści chram u hetym ža rajonie, ale na inšym učastku — pa vulicy Šuhajeva — i ŭ inšym vyhladzie. Tady prajekt bolš nahadvaŭ kłasičnyja rańniechryścijanskija baziliki IV—VI stahodździaŭ z charakternym porcikam pierad hałoŭnym fasadam.
Chram Śviatoj Mučanicy Taćciany, jaki chočuć pabudavać na rahu vulic Rusijanava i Nikifarava. Z materyjałaŭ hramadskaha abmierkavańnia
Chram Śviatoj Mučanicy Taćciany, jaki chočuć pabudavać na rahu vulic Rusijanava i Nikifarava. Z materyjałaŭ hramadskaha abmierkavańnia
Novym miescam staŭ nievialiki skvier na rahu vulic Rusijanava i Nikifarava — pobač z žyłymi damami i paliklinikaj. Jak i ŭ minułym varyjancie, architektaram vystupiŭ Vital Arabiej, jaki praciahvaje pierajmać uzory rańniechryścijanskaj architektury.
Pavodle płana, chram u Uruččy budzie mieć vyšyniu 16 mietraŭ, daŭžyniu 22,5 i šyryniu 18,6 mietra. Jon raźličany na 210 čałaviek i ŭklučaje malitoŭnuju zału, ałtar, chory, ryźnicu i dziciačuju placoŭku na prylehłaj terytoryi.
Rymskija aluzii
Łateranski baptysteryj u Rymie. Fota: Wikimedia Commons
Architektura prajektavanaha chrama zasnavana na tradycyjach rymskaha dojlidstva pieršych stahodździaŭ našaj ery, što, pavodle tekstu prajekta, adpaviadaje času i miescu žyćcia śviatoj mučanicy Taćciany. Asnoŭnuju rolu pry vybary centryčnaj kampazicyi budynka carkvy adyhrała architektura maŭzalejaŭ i martyryjaŭ — zbudavańniaŭ, dzie chavali śviatych, u pieršuju čarhu mučanikaŭ, a taksama baptysteryjaŭ, pryznačanych dla abradu chryščeńnia.
Vaśmikutnik z časoŭ antyčnaści ličyŭsia najbližejšaj da kruha fihuraj siarod šmatkutnikaŭ, simvałam daskanałaści, spakoju i viečnaści.
Płan baziliki San-Vitale ŭ Ravienie. Fota: Wikimedia Commons
Bazilika San-Vitale ŭ Ravienie. Fota: Wikimedia Commons
Siarod architekturnych uzoraŭ, jakija natchniali aŭtaraŭ prajekta, nazyvajucca maŭzalej Dyjakletyjana ŭ Splicie (IV stahodździe, ciapier Charvatyja), bazilika Śviatoha Stefana ŭ Rymie (V stahodździe), bazilika San-Vitale ŭ Ravienie (VI stahodździe) i Łateranski baptysteryj u Rymie (IV stahodździe). Praŭda, mučanickaja śmierć Taćciany adbyłasia značna raniej — u pieršaj pałovie III stahodździa, tamu adpaviednaść architektury času i miescu žyćcia śviatoj vyhladaje davoli ŭmoŭnaj.
Skvier pad znos
Kali architekturna hety prajekt sapraŭdy niešta novaje dla Minska i vyłučajecca na fonie typovych chramaŭ u psieŭdaruskim styli, to voś padychod da vybaru miescaŭ pad chramy ŭ RPC zastaŭsia tradycyjnym.
Skvier, na miescy jakoha moža paŭstać čarhovaja pravasłaŭnaja carkva. Jandeks Panaramy
Novy chram płanujuć uźvieści na terytoryi nievialikaha skviera, husta zasadžanaha drevami.
Miarkujučy pa charaktary nasadžeńniaŭ, hetaja placoŭka vykarystoŭvaŭsia prykładna z 2016 hoda dla kampiensacyjnych pasadak — vysadki novych dreŭ zamiest tych, što byli źniesieny pad inšyja budaŭničyja prajekty ŭ inšych častkach horada. Ciapier ža nadyšła čarha i hetych dreŭ, jakija za dziesiać hadoŭ prynialisia, paśpieli padraści i sfarmavali paŭnavartasnuju zialonuju zonu.
Pavodle prajekta, bolšaja častka hetych dreŭ traplaje abo pad sam budynak chrama, abo pad vybrukavanuju placoŭku vakoł jaho, a taksama pad darožki i dziciačuju placoŭku.
Skvier, dzie płanujuć pastavić carkvu, na spadarožnikavym zdymku
Hienieralny płan Chram Śviatoj Mučanicy Taćciany. Drevy abaznačany adpaviednymi značkami. Z materyjałaŭ hramadskaha abmierkavańnia
U tłumačalnaj zapiscy adznačajecca, što raźmiaščeńnie chrama ŭ piešaj dastupnaści stanoŭča paŭpłyvaje na ŭzrovień kamfortu i ekałahičny stan hetaj častki Minska. Pry hetym u prajekcie nie ŭdakładniajecca, jakim čynam vysiečka bolšaj častki skviera moža palepšyć ekałahičnuju situacyju ŭ rajonie.
Zakon i praktyka
Zhodna ź dziejučym hienieralnym płanam Minska, budaŭnictva kultavych zbudavańniaŭ zabaroniena ŭ łandšaftna-rekreacyjnych zonach, da jakich naležać usie parki i skviery. Adnak hetaja norma ni razu nie stała pieraškodaj dla budaŭnictva pravasłaŭnych chramaŭ u zialonych zonach stalicy.
Apošnija hady Ruskaja pravasłaŭnaja carkva aktyvizavała svaju dziejnaść u śfiery chramabudaŭnictva, imknučysia pastavić svaje chramy amal na kožnym volnym kavałku ziamli ŭ Minsku. Paralelna adbyvajucca hramadskija abmierkavańni jašče jak minimum dvuch novych chramaŭ — u tym liku chrama praviednaha Iaana Kranštackaha pa vulicy Janki Bryla, sprajektavanaha tym ža Vitalom Arabiejem.
Pry hetym realnaja patreba haradžan u novych chramach zastajecca nieviadomaj — u Biełarusi adsutničaje aficyjnaja statystyka pa kolkaści viernikaŭ roznych kanfiesij.
Hramadskaje abmierkavańnie prajekta va Uruččy pačałosia 20 kastryčnika i praciahniecca da 3 listapada ŭklučna. Zaŭvahi i prapanovy možna dasyłać u administracyju rajona ŭ piśmovaj formie z paznakaj «hramadskija abmierkavańni».