Trom žančynam dali kałoniju i vielizarnyja štrafy za dvarovy čat. Siarod ich 62‑hadovaja zavuč
Maryna Pietražyckaja, Nastaśsia Sikiryckaja i Nastaśsia Harčakova ŭžo ŭ kałonii. Im prysudzili pa dva hady, a jašče dali hihanckija štrafy — pa $11500. Pa źviestkach pravaabaroncaŭ, žančyn vinavacili ŭ stvareńni zakrytaha dvarovaha čata.
Źleva naprava: Maryna Pietražyckaja, Nastaśsia Sikiryckaja, Nastaśsia Harčakova
Marynie Pietražyckaj 62 hady. Pa źviestkach «Viasny», jana ŭ 1984 hodzie skončyła Minski piedahahičny instytut (ciapier — BDPU). Paśla hetaha jana amal 40 hadoŭ vykładała matematyku. Da zvalnieńnia pracavała zavučam u himnazii №34 Minska.
U lipieni 2021 hoda Marynu zatrymali, praviali pieratrus i zładzili dopyt u KDB. Paśla hetaha jaje kinuli na 15 sutak na Akreścina i zvolnili z himnazii.
Nastaśsi Harčakovaj 43 hady. Jana minčanka. U žančyny dvoje niepaŭnaletnich dziaciej.
Nastaśsia Harčakova. Fota ź jaje staronki ŭ fejsbuku
U 2006 hodzie skončyła Biełaruski dziaržaŭny piedahahičny ŭniviersitet. Ale ŭ škole jana nie zatrymałasia. Pa źviestkach ź jaje sacsietak, Nastaśsia niejki čas pracavała ŭ «Makdonaldsie».
Paśla jana zaniałasia ramiastvom — rabiła ŭpryhožańni i cacki svaimi rukami na prodaž. A ŭrešcie stała prafiesijnym fatohrafam, śpiecyjalizujecca na siamiejnaj i dziciačaj fatahrafii.
Nastaśsi Sikiryckaj 44 hady. Jana taksama minčanka. Viadoma pra jaje mienš za ŭsich — žančyna zamužam, haduje dvaich dziaciej. Nastaśsia lubić aŭtamabili i ŭsio, što ź imi źviazana.
Nastaśsia Sikiryckaja. Fota ź jaje staronki ŭ Facebook
Marynu Pietražyckuju, Nastaśsiu Harčakovu i Nastaśsiu Sikiryckuju zatrymali ŭvosień 2024 hoda.
U lipieni 2025‑ha žančynam prysudzili pa dva hady kałonii i 800 bazavych štrafu za «stvareńnie ekstremisckaha farmiravańnia». 800 bazavych na toj momant — heta 33 600 rubloŭ, ci $11500. Ciapier žančyny ŭ kałonii. Kali jany dasiadziać da kanca terminu, to vyjduć na svabodu prykładna praz paŭhoda.
Pa źviestkach «Viasny», sprava ŭ abłavie na supolnaść udzielnikaŭ zakrytych dvaravych čataŭ, jakaja adbyłasia ŭ minułym hodzie. Viadoma pra bolš za dziasiatak asudžanych pa troch takich spravach, usim prysudzili pazbaŭleńnie voli i bujnyja štrafy.
Lik zatrymanych tady išoŭ na sotni, ale dakładnaja kolkaść abvinavačanych nieviadomaja.
Čytajcie taksama:
Vializnaja chvala zatrymańniaŭ — stała zrazumieła, na kaho hetym razam palavali KDB i HUBAZiK
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć