Što za sieryjał «Bar «Adzin zvanok», jaki masava šukajuć biełarusy?

Paśla pačatku vajny z hetaha rasijskaha sieryjała vyrazali adnaho z akcioraŭ.

Fota: kadr z trejlera

Kali niekalki dzion tamu ŭ krainie źnik dostup da «Ukantakcie», akazałasia, što samymi papularnymi zapytami ŭ biełaruskim huhle ŭ toj dzień była infarmacyja ab pryčynach zboju, a taksama adzin rasijski sieryjał. Pra što hety «Bar «Adzin zvanok»?

Sieryjał źniali jašče ŭ 2023 hodzie, ale vyjšaŭ jon tolki ŭ kastryčniku 2025-ha. Praz cenzuru prajekt pralažaŭ dva hady na palicy. U pačatku poŭnamaštabnaj vajny šoŭranier sieryjała Daniła Kazłoŭski napisaŭ antyvajenny post. Prajekty z artystam pastavili na paŭzu, ale paźniej toj post byŭ vydaleny, a samoha Kazłoŭskaha vykraślili z čornych śpisaŭ. Dla spraviadlivaści adznačym, što nijakich publičnych pakajańniaŭ ci vystupaŭ u Maryŭpali dla hetaha nie spatrebiłasia.

Ale ž pamiłavali nie ŭsich. Akcior Maksim Vitarhan syhraŭ nievialikuju rolu ŭ prajekcie. Adnak źniešnaść i hołas Vitarhana, jaki taksama vystupiŭ suprać vajny, pamianiali z dapamohaj štučnaha intelektu, jaho imia prybrali z tytraŭ. Novyja technałohii ŭzbahačajuć cenzuru.

Dyk što heta za bar?

Jon nie maje adrasa, prostamu čałavieku tudy nielha pazvanić. Hety bar sam vas znojdzie, kali ŭ vas niechta pamior. Śmiašlivy barmien unutry (jaho hraje Kazłoŭski) biaspłatna nalivaje ałkahol i ci to sprabuje razhavaryć, ci to ŭhavorvaje syhrać u barnuju hulniu.

Fota: kadr z trejlera

Pavodle jaje praviłaŭ, vy atrymlivajecie chvilinu na toje, kab pahavaryć z pamierłym čałaviekam na vaš vybar. Ale ž adkazu nie pačujecie — zamiest hetaha buduć ličby na dysku telefona, i barmien-Kazłoŭski budzie ich vam chutka pierakładać u słovy. Kali chvilina skončyłasia, treba płacić pa rachunku. Dla hetaha treba zhulać raŭnd u ruskuju ruletku.

Vyžyli? Možna zvanić jašče, voś tolki kulaŭ u barabanie revalviera budzie ŭžo dźvie, i hetak dalej. Daloka nie ŭsie mohuć spynicca na adnym zvanku — kali pačaŭ raskałupvać svaje rany i chapacca za minułaje, heta zaciahvaje.

Fota: kadr z trejlera

Vyhladaje, stvaralniki «Bara» natchnialisia japonskim anime z padobnym siužetam. Havorka pra tryler Death Parade 2015 hoda. Tam taksama isnavaŭ praklaty bar, voś tolki prychodzili ŭ jaho nie žyvyja ludzi, a sami niabožčyki. Im u bary ładzili hulni i pa ich vyniku vyśviatlali, kudy pojdzie duša — u raj ci piekła.

Cikava, što cenzura prapuściła ŭ sieryjale vidavočna palityčny žart. Kali adzin z klijentaŭ bara telefanuje admirału Kałčaku, toj pytajecca, ci adradziłasia ŭ Rasii manarchija. Surazmoŭca adkazvaje: maŭlaŭ, možna i tak skazać.

Barmienu ŭ pracy dapamahaje padletak Vicia. Niekali jon skarystaŭsia pasłuhami bara, ale nie pažadaŭ płacić, i jamu dazvolili zastacca ŭ bary — zrešty, pracoŭnyja ruki lišnimi nie byvajuć. Ale ž u Vici «na voli» zastaŭsia baćka, panury śledčy Marozaŭ, i ź ciaham času jon vychodzić na śled bara.

Fota: kadr z trejlera

Siarod usich praduktaŭ, jakija prapuściła rasijskaja cenzura, «Bar «Adzin zvanok» — daloka nie horšy varyjant. Na IMDb sieryjał maje adznaku 7,4 z 10.

Tut jość šmat zahadak. Ci zdoleje Marozaŭ znajści bar? Ci atrymajecca ŭ kahości z klijentaŭ uratavacca ad apłaty pa rachunku? Što za historyja ŭ barmiena? I zrešty, kamu naležyć sam bar? 

Jość u sieryjale i svaja fiłasofija. Ludzi, jakija prychodziać u bar i hinuć tam, zachraśli ŭ minułym — nastolki, kab za chvilinu hutarki, jakoj časta i nie chapaje, ryzykavać usioj svajoj budučyniaj. U zvyčajnym žyćci, viadoma, za prystupy viny ci nastalhii nie davodzicca płacić raŭndami ruskaj ruletki, ale biaśpiečnaj hetaja sprava ŭsio roŭna nie robicca.

Kamientary da artykuła