10 jeŭrapiejskich filmaŭ, jakija pakažuć na kinafiestyvali «Paŭnočnaje źziańnie». Niekatoryja buduć iści biaspłatna anłajn
Chorar pra viadomuju sieryjnuju zabojcu dziaciej, kazka pavodle skandynaŭskaj lehiendy i detektyŭ pra pošuki nosa Złatana Ibrahimoviča. Niekatoryja ź filmaŭ prahramy majuć prestyžnyja ŭznaharody i naminacyi.
Mižnarodnaja prahrama XI kinafiestyvalu «Paŭnočnaje źziańnie» abjadnała dziesiać filmaŭ z krain Skandynavii i Bałtyi, jakija možna budzie pahladzieć anłajn i afłajn z 3 pa 23 listapada.
Usie filmy anłajn-prahramy buduć dastupnyja zhodna z raskładam z 00:00 da 23:59 pa minskim časie.
«Prync — bieły miadźviedź»
2024, Narviehija
8 listapada — 16:30, Varšava, k/t 'Kinoteka', kvitki chutka źjaviacca ŭ prodažy
Animacyjny miuzikł pra kachańnie, advahu i harmoniju z pryrodaj. Režysior u supracoŭnictvie z narviežskaj dziciačaj piśmieńnicaj Majaj Łunde pieraasensoŭvaje adnu z samych lubimych narodnych kazak Skandynavii. Atrymlivajecca kranalnaja i daścipnaja historyja pra dapytlivuju i pradprymalnuju dziaŭčynku Liŭ, biełaha miadźviedzia Valemona, jaki na samoj spravie źjaŭlajecca začaravanym pryncam, ich pryhody i baraćbu sa złoj viedźmaj.
«Dziaŭčyna ź ihołkaj»
2024, Polšča, Šviecyja, Danija
9 listapada — 18:00, Varšava, k/t 'Kinoteka', kvitki chutka źjaviacca ŭ prodažy
Zmročnaja historyja, jakaja syšła byccam sa staronak zbornika bratoŭ Hrym, a nasamreč, zasnavanaja na realnym fakcie z navinnaj chroniki Kapienhahiena za 1920 hod.
Paśla pieršaj suśvietnaj vajny maładaja žančyna Karalina, zastaŭšysia biez chaty i pracy švački, dy jašče i sam-nasam ź ciažarnaściu, hublaje lubyja nadziei na śvietłuju budučyniu. Vypadkovaja sustreča z Dahmar, jakaja zajmajecca nielehalnym usynaŭleńniem pazašlubnych dziaciej, zdajecca promieniem śviatła ŭ ciemry, ale heta tolki na pieršy pohlad. Suśvietnaja premjera stužki adbyłasia ŭ asnoŭnym konkursie Kanskaha kinafiestyvalu 2024 hoda.
«Nieviadomy krajavid»
2024, Narviehija
10 listapada — online z 00:00 da 23:59 (prahlad filma mahčymy tolki z terytoryi Biełarusi)
3 listapada — 18:00, Vilnius, k/t Skalvija, kvitki na pakaz
«Kapitan Fantastyk» na narviežski ład i z realnaha žyćcia — film, što atrymaŭ hran-pry žury dakumientalnaj siekcyi fiestyvalu Sundance-2024. Na fonie narviežskich lasoŭ razhortvajecca kranalnaja elehija pra siamju «dzikunoŭ», jakaja viartajecca da cyvilizacyi paśla śmierci Maryi — žonki, maci i inicyjatarki ich «dzikaha» isnavańnia. Nik i čaćviora dziaciej sprabujuć zachavać ideały harmonii z pryrodaj, ale ŭtapičnaja idylija chutka pieratvarajecca ŭ zmahańnie za vyžyvańnie.
Režysiorka Silje Evensma Jakabsen stvaraje kranalnaje daśledavańnie smutku, staleńnia i pošuku novych formaŭ siamji, uvažliva nazirajučy, jak blizkija vučacca žyć biez Maryi i šukajuć raŭnavahu pamiž pryrodaj i hramadstvam, svabodaj i adkaznaściu, adzinotaj i luboŭju.
«Dva mianie»
2024, Estonija
10, 17 listapada — online z 00:00 da 23:59
Aŭtafikšan pra pošuki siabie, svabody tvorčaści i sutnaści kino. Poŭnamietražny debiut bratoŭ Raŭla i Rometa Eska — samairaničnaje daśledavańnie fienomienu dvajniactva i chaatyčnaja drama staleńnia. 25‑hadovyja braty, jakija ŭsio ŭ žyćci dzialili napałam, sprabujuć navučycca być samastojnymi i nie stracić suviazi adzin z adnym. Ich padarožža ad estonskaj kinaškoły da Nihieryi stanovicca mietafaryčnym partretam pakaleńnia TikTok, što šukaje siabie pad pastajannym prycełam videakamiery.
«Samakrutki»
2024, Estonija
11, 21 listapada — online z 00:00 da 23:59
Siebaśćian pracuje ŭ nievialikaj talinskaj kramie i viadzie miernaje žyćcio. Jaho śviet pieravaročvajecca z noh na hałavu, kali jon sustrakaje Siło, hiedanista i letucieńnika. Razam jany palać kanabis, abmiarkoŭvajuć žyćcio i marać pra bilet u adzin kaniec u Braziliju, dzie ŭsio moža być inakš.
Hruntujučysia na ŭłasnym dośviedzie i hutarkach z adnahodkami, Meel Palijale stvaraje partret pakaleńnia maładych ludziej, što šukajuć svajo miesca i svabodu ŭ śviecie, jaki pastajanna mianiajecca. Stužka atrymała pryz hladackich simpatyj na Talinskim kinafiestyvali (PÖFF), a ciapier jašče i vyłučajecca ad Estonii ŭ jakaści pretendenta na kinapremiju «Oskar».
«Rody: bol i radaść»
2024, Finlandyja
12, 20 listapada — online z 00:00 da 23:59 (prahlad filma mahčymy tolki z terytoryi Biełarusi)
Dakumientalny film pra prava žančyny viarnuć sabie kantrol nad samym staražytnym i samym asabistym žyćciovym pracesam — naradžeńniem dziciaci.
Rody — adzin z samych naturalnych, ale pry hetym najbolš kantralavanych pracesaŭ u žyćci žančyny. Čamu rašeńnie naradžać doma ŭsprymajecca jak niešta radykalnaje, amal akt buntu? Finskaja dakumientalistka Karalijna Hrendal sprabuje adkazać na hetaje pytańnie. Nazirajučy za niekalkimi ciažarnymi žančynami, a taksama za akušerkaju Kirsi i doŭłaj Annaj-Rytaj, jana daśleduje praces naradžeńnia jak fizičny i duchoŭny dośvied, u jakim davier i vybar važniejšyja za miedyčnyja praviły.
«Ilvica»
2024, Estonija, Hiermanija, Łatvija
14, 18 listapada — online z 00:00 da 23:59
Emacyjnaje razvažańnie pra maciarynskuju luboŭ i tonkuju miažu pamiž abaronaju, kantrolem dy zaležnaściu. Fielčarka chutkaj dapamohi sprabuje ŭratavać 15‑hadovuju dačku, ciažkaha padletka sa schilnaściu da samarazbureńnia, jakaja źviazałasia z drennaju kampanijaj. Kali dziaŭčyna traplaje ŭ špital paśla pieradaziroŭki narkotykami, maci vykradaje jaje prosta z pałaty i zamykaje ŭ starym zaharadnym domie, dumajučy, što hetak zdoleje vylekavać ichnyja stasunki. Pamiž maci i dačkoju razharajecca balučaja psichałahičnaja duel, dzie kłopat i hvałt pieraplatajucca. Film atrymaŭ premiju EFTA (estonski «Oskar»).
«Moj dziadźka Jens»
2025, Narviehija, Rumynija
15, 19 listapada — online z 00:00 da 23:59 (prahlad filma mahčymy tolki z terytoryi Biełarusi)
Kranalnaje i śmiešnaje razvažańnie pra stračanyja siamiejnyja suviazi, kulturnuju identyčnaść i asabistyja miežy.
Akam, małady vykładčyk litaratury kurdskaha pachodžańnia, žyvie spakojnym žyćciom u Osła, pakul adnojčy ŭnačy da jaho nie pryjazdžaje dziadźka Chadr — svajak ź iranskaj častki Kurdystanu, jakoha jon nie bačyŭ ź dziacinstva. Akam prymaje jaho ŭ svajoj «kamunałcy» na niekalki dzion, ale Chadr, što ciapier nazyvaje siabie Jensam i chvalicca biznesam na radzimie, vidavočna nie źbirajecca sychodzić. Praz kulturnyja adroźnieńni i moŭny barjer napružańnie pamiž imi raście z kožnym dniom.
«Nos Złatana»
2025, Šviecyja
16 listapada — online z 00:00 da 23:59 (prahlad filma mahčymy tolki z terytoryi Biełarusi)
7 listapada — 18:30, Varšava, k/t 'Kinoteka', kvitki chutka źjaviacca ŭ prodažy
Historyja pra toje, jak Złatan Ibrahimovič pieratvaryŭsia z kumira žycharoŭ Malmio ŭ amal piersonu non-hrata ŭ rodnym horadzie, daŭno stałasia lehiendaju. Kali jon hulaŭ za miascovuju kamandu, jaho ličyli hierojem, ale ŭ 2019‑m Złatan niečakana staŭ suŭładalnikam stakholmskaha «Hamarbi» — zaklataha supiernika «Malmio». Bronzavaja statuja futbalista kala stadyjonu adrazu stała mišeńniu dla vandałaŭ — urešcie chtości adrezaŭ joj nos. Hety zahadkavy vypadak tak uzrušyŭ šviedskuju fanackuju supolnaść, što try teležurnalisty źniali tru-krajm pra pošuk nosa. Im dapamahaje ekscentryčny pryvatny detektyŭ Klas Ekman, čyja luboŭ da starych špijonskich filmaŭ viadzie historyju ŭ niečakanaje i vielmi zachaplalnaje rečyšča.
«Amieryka načležak»
2025, Narviehija, Niderłandy, ZŠA
23 listapada — online z 00:00 da 23:59
Hłyboka realistyčny partret padletka, jaki žyvie na zmročnym baku «amierykanskaj mary». Narviežskaja fatohrafka Monika Stremdal u svaim debiutnym dakumientalnym filmie raspaviadaje historyju 12‑hadovaha Mikała, jaki raście pobač z baćkami z ałkaholnaj zaležnaściu ŭ ciesnym hatelnym pakoi na miažy halečy. Biez asudžeńnia i z redkaj čullivaściu režysiorka pakazvaje, jak zaležnaść razburaje nie tolki cieła, ale i siamiejnyja suviazi, pieratvarajučy dom u pastku, ale navat u ciemry pakidaje miesca nadziei.
Padtrymać kamandu kinafestyvalu možna pa spasyłcy.
Kamientary
Biez woke pichańnia afrykancaŭ, łhbtk12345, hiendarnaść, fieminizmu i tak dalej.
Možna? Možna!
[Zredahavana]
Bo słova afrykancy maje krychu inšaje značańnie.