Kiraŭnik litoŭskaha departamientu biaśpieki: Minsk imkniecca destabilizavać situacyju šarami, ale kančatkovaja meta niezrazumiełaja
Kiraŭnik Departamienta dziaržaŭnaj biaśpieki Litvy Remihijus Brydykis u razmovie z žurnalistami LRT zajaviŭ, što situacyjaj z pavietranymi šarami z boku Biełarusi Minsk imkniecca destabilizavać abstanoŭku ŭ Litvie, ale kančatkovaja meta zastajecca niavyznačanaj.
Remihijus Brydykis. Fota: vsd.lt
«My ŭsie ciapier u napružańni. Nie sumniavajusia, što Biełaruś viedaje, što ciapier adbyvajecca. Jany razumiejuć, i Minsk vydatna aceńvaje situacyju. Ale my nie možam dakładna skazać, jakaja ŭ dadzienym vypadku meta», — skazaŭ Brydykis žurnalistam.
Kiraŭnik DDB Litvy adznačyŭ, što litoŭskaja raźviedka dapamahaje inšym viedamstvam u praduchileńni pahroz.
«My robim toje, što i zaŭsiody. My ŭdzielničajem u pracesach, prymajem peŭnyja miery, jakija dazvalajuć nam zrazumieć namiery praciŭnika. My padali infarmacyju asobam, jakija prymajuć rašeńni, i, spadziajusia, rašeńni buduć adekvatnymi», — zajaviŭ jon.
Hienieralny prakuror Nida Hrunskienie admoviłasia prakamientavać žurnalistam, dziejničajuć arhanizatary «destabilizujučaj» kantrabandnaj schiemy ŭ Litvie ci Biełarusi.
«Ja b pakul nie chacieła davać kamientaroŭ, bo nie chaču naškodzić dasudovamu rasśledavańniu», — skazała jana.
Hrunskienie dadała, što dasudovaje rasśledavańnie pakul nie vyjaviła nijakich źviestak ab tym, što kantrabanda źviazanaja z čym-niebudź, akramia arhanizavanaj złačynnaści, jakaja imkniecca nažycca na nielehalnym abarocie cyharet.
«Ja nie mahu skazać, kolki dasudovych rasśledavańniaŭ było zaviedziena, zdajecca, kala 13. Ale epizodaŭ šmat, epizody abjadnoŭvajucca ŭ hetyja dasudovyja rasśledavańni. U suviazi z apošnimi padziejami raspačatyja asobnyja dasudovyja rasśledavańni, u nas taksama jość padazravanyja, (…) i abranyja miery strymańnia», — skazała hienprakuror.
Siońnia ŭrad Litvy pryniaŭ rašeńnie pra zakryćcio miažy ź Biełaruśsiu minimum da sierady. Paśla pasiadžeńnia ŭrada stanie viadoma pra dalejšaje raźvićcio situacyi. Litoŭski bok hatovy da doŭhaterminovaha zakryćcia miažy.
«My ŭžo padrychtavali rašeńnie ab zakryćci miažy ź Biełaruśsiu na nieakreśleny termin», — zajaviła premjer-ministr Inha Ruhinienie.
Pamiežny pierachod «Salečniki» (ź biełaruskaha boku «Bieniakoni») całkam zakryty, a praz «Miedniki» («Kamienny Łoh») mohuć jechać niekatoryja katehoryi asob.
Viečaram 26 kastryčnika čarhovy raz była spyniena praca Vilenskaha aeraporta. Heta ŭžo treci viečar zapar, kali z-za vialikaj kolkaści kantrabandysckich šaroŭ z boku Biełarusi spynialisia paloty i zakryvalisia pamiežnyja punkty propusku. Ahułam u kastryčniku było sarvana bolš za 170 rejsaŭ u litoŭskich aeraportach, paciarpieli 27 000 pasažyraŭ.