Tusk zajaviŭ pra hatoŭnaść adkryć Babroŭniki i Kuźnicu ź listapada
«My budziem hatovyja adkryć dva pamiežnyja pierachody ŭ Babroŭnikach i Kuźnicy», — zajaviŭ 28 kastryčnika premjer-ministr Polščy Donald Tusk. Adkryćcio pierachodaŭ płanujecca na listapad.
Na polska-biełaruskaj miažy. Fota: AP Photo / Michal Dyjuk
«Kali my kažam pra toje, što hetyja pierachody mohuć być adkrytyja, to hałoŭnym čynam tamu, što miaža ciapier achoŭvajecca tak dobra, jak nikoli raniej. Dziakujučy našym sumiesnym namahańniam polska-biełaruskaja miaža, badaj što, ciapier źjaŭlajecca miažoj, jakaja achoŭvajecca najlepš u Jeŭropie. I dziakujučy hetamu my možam dazvolić sabie peŭnuju ryzyku, źviazanuju z adkryćciom hetych pierachodaŭ, bo miarkujem, što karyść ad hetaha bolšaja, čym ryzyka, źviazanaja z hetym. Mienavita tamu, što atrymałasia ŭmacavać hetuju miažu», — padkreśliŭ polski premjer.
Tusk adznačyŭ, što heta budzie «probnaje» rašeńnie.
«Usio śviedčyć pra toje, što kali my ŭzhodnim hetuju spravu taksama ź litoŭcami, skaardynujem našy dziejańni, to ŭ listapadzie pavinny adkryć hetyja dva pierachody. Skažam tak: na probu», — dadaŭ jon, adznačyŭšy, što «kali ź jakich-niebudź pryčyn daviadziecca zakryć miažu, jon nie budzie vahacca ni chviliny».
«Spadziajusia, što ŭsie razumiejuć, pa abodva baki miažy, biez vyklučeńnia, što hetyja pierachody mohuć słužyć zvyčajnym ludziam», — dadaŭ jon.
Pa słovach polskaha premjera, u vypadku Babroŭnikaŭ «niama łahistyčnych» prablem dla adkryćcia pierachodu. Što tyčycca Kuźnicy, to da kanca hoda ruch budzie dazvoleny tolki dla aŭtamabilaŭ vahoj da 3,5 tony. Pryčyna — ramont pakryćcia darohi, jaki idzie akurat ciapier.
«Što tyčycca Połaŭcaŭ (Połaŭcy-Piaščatka), to pakul tam znachodzicca vajskovy łahier, havaryć pra jaho adkryćcio niemahčyma», — patłumačyŭ Tusk.
Raniej Polšča zakryła šerah pierachodaŭ ź Biełaruśsiu, spasyłajučysia na pytańni biaśpieki i paharšeńnie adnosin pamiž Varšavaj i Minskam. Pavodle Tuska, adkryćcio novych punktaŭ moža stać «krokam da narmalizacyi kantrolu na miažy», kali situacyja zastaniecca stabilnaj.
Adkryćcio pierachodaŭ moža śviedčyć pra aściarožnuju narmalizacyju ŭ adnosinach dźviuch krain. Pakul niajasna, što abiacaje Minsk uzamien.
Čytajcie taksama:
«Jon sapraŭdy jak mała chto zasłužyŭ jaje» — Milinkievič pra premiju dla Pačobuta
Polšča rezka skaraciła vydaču mižnarodnaj abarony zamiežnikam, u tym liku biełarusam