Z 1 listapada zabaroniać łavić dva vidy ryb

Z 1 listapada pa 15 śniežnia nielha łavić siha čudskaha, a z 1 listapada pa 21 sakavika — soma zvyčajnaha. Za parušeńnie hetych pravił rybałovu moža pahražać štraf da 1260 rubloŭ, paviedamili ŭ Biełaruskim tavarystvie palaŭničych i rybałovaŭ (BTPR).

Sih čudski. Fota: fishingby.com

U BTPR tłumačać, što zabarona źviazanaja z asablivaściami žyćcia hetych ryb. Naprykład, som zvyčajny drenna pieranosić choład i ŭžo ŭ listapadzie kładziecca na zimoŭku, robiačysia amal nieruchomym — tamu ŭ hety čas jon lohkaja zdabyča dla rybałovaŭ. Kab zachavać jaho papulacyju, uvodzicca siezonnaja zabarona jak na pramysłovuju, tak i na amatarskuju łoŭlu.

Što da siha čudskaha, pradstaŭnika siamiejstva łasosievych, to mienavita ŭ hety pieryjad u jaho pačynajecca nierast, tamu zabarona patrebnaja, kab stvaryć spryjalnyja ŭmovy dla adnaŭleńnia papulacyi.

Zhodna z artykułam 16.25 Kodeksa ab administracyjnych pravaparušeńniach RB, za łoŭlu ryby ŭ zabaronieny čas praduhledžanyja štrafy:

• dla hramadzian — ad 10 da 30 bazavych vieličyń (ad 420 da 1260 rubloŭ);
• dla indyvidualnych pradprymalnikaŭ — ad 20 da 100 bazavych (ad 840 da 4200 rubloŭ);
• dla jurydyčnych asob — ad 100 da 500 bazavych (ad 4200 da 21000 rubloŭ).

Akramia taho, za kožnuju niezakonna złoŭlenuju rybinu daviadziecca kampiensavać škodu navakolnamu asiarodździu ŭ trajnym pamiery.

Kamientary da artykuła