Francyi ŭdałosia vyciahnuć dvuch svaich hramadzian ź iranskich turmaŭ
Prezident Francyi Emanuel Makron abjaviŭ pra vyzvaleńnie francuzskich hramadzian Siesil Kaler i Žaka Parysa, jakija praviali try hady ŭ iranskaj turmie pa abvinavačańniach u špijanažy, paviedamlaje Euronews.
Fota: AP Photo/Aurelien Morissard
Emanuel Makron u sacsietcy X napisaŭ:
«Vialikaja palohka — Siesil i Žak narešcie vyzvalenyja. Dziakuj usim, chto pracavaŭ nad hetym składanym dypłamatyčnym pytańniem».
Vyzvaleńnie adbyłosia paśla intensiŭnych pieramoŭ pamiž Paryžam i Tehieranam, jakija doŭžylisia niekalki tydniaŭ.
Kaler i Parys byli zatrymanyja ŭ mai 2022 hoda padčas turystyčnaj pajezdki ŭ Iran. Ich abvinavacili ŭ špijanažy na karyść francuzskich i izrailskich śpiecsłužbaŭ. 14 kastryčnika 2025 hoda iranski sud prysudziŭ Siesil Kaler 20 hadoŭ, a Žaku Parysu — 17 hadoŭ źniavoleńnia.
Makron paviedamiŭ, što francuzskaja para ŭžo vyjšła z turmy Evin u Tehieranie i ciapier nakiroŭvajecca ŭ pasolstva Francyi. Prezident Francyi nazvaŭ heta «vialikaj palohkaj i pieršym krokam» i padkreśliŭ, što dyjałoh praciahvajecca, kab jak maha chutčej viarnuć vyzvalenych u Francyju.
Blizkija byłych viaźniaŭ paviedamili, što paśla vyniasieńnia prysudu Siesil i Žak byli na miažy fizičnych i psichałahičnych siłaŭ. Siastra Siesil, Naemi Kaler, havaryła, što joj udałosia pahavaryć ź imi ŭsiaho vosiem chvilin pa videasuviazi pad nahladam turemnikaŭ i što heta byŭ sapraŭdny «sihnał tryvohi».