Sinhapur uvodzić abaviazkovaje łupcavańnie rozhami jak pakarańnie dla anłajn-machlaroŭ

Kab supraćstajać rostu kolkaści kibierzłačynstvaŭ, horad-dziaržava źviarnuŭsia da cialesnaha pakarańnia — praktyki, jakaja zastałasia ŭ spadčynu ad brytanskaj kałanijalnaj epochi.

Palicejski kala budynku parłamienta Sinhapura. Fota: AP Photo / Wong Maye-E

Na hetym tydni parłamient Sinhapura ŭnios papraŭki ŭ kryminalnaje zakanadaŭstva, uvioŭšy łupcavańnie jak abaviazkovaje pakarańnie dla machlaroŭ i ich pamahatych. Jak paviedamlaje The Washington Post, heta rašeńnie było pryniata paśla taho, jak za pieršaje paŭhodździe hetaha hoda byli zarehistravanyja dziasiatki tysiač vypadkaŭ machlarstva, što pryviało da strataŭ u pamiery amal 385 miljonaŭ dalaraŭ ZŠA. Raniej ułady nadali palicyi prava abmiažoŭvać bankaŭskija tranzakcyi, kali jość padazreńnie na machlarstva.

Pavodle paviedamleńniaŭ miascovych ŚMI, ciapier kožny, chto ździejśniŭ machlarstva praz srodki dystancyjnaj suviazi, budzie atrymlivać minimum šeść udaraŭ, a maksimalnaje pakarańnie moža dasiahać 24.

Machlarstvy stali najbolš raspaŭsiudžanym vidam złačynstva ŭ krainie — jany składajuć kala 60% usich zarehistravanych vypadkaŭ, i za piać hadoŭ naniesła strat na 3,7 miljarda sinhapurskich dalaraŭ (kala 2,85 miljarda amierykanskich).

Niekatoryja machlarskija sietki vykarystoŭvali finansavuju stabilnaść i dziełavoje asiarodździe Sinhapura, kab nadać sabie vyhlad zakonnych kampanij. Heta vyklikała zaniepakojenaść nakont roli krainy ŭ raspaŭsiudzie šmatmiljardnaj industryi kibiermachlarstva, jakaja hłyboka ŭkaraniłasia ŭ Paŭdniova-Uschodniaj Azii.

Zakonaprajekt praduhledžvaje, što pad dziejańnie novaha zakanadaŭstva trapiać taksama arhanizatary i viarboŭščyki machlarskich sindykataŭ, jakija buduć padlahać cialesnamu pakarańniu ŭ vypadku pryznańnia vinavatymi.

Cialesnaje pakarańnie, jakoje ŭžyvajecca z dapamohaj ratanhavaha hučka i vykonvajecca paśla miedycynskaha ahladu, nie źjaŭlajecca navinkaj dla Sinhapura. Jano było zakanadaŭča zamacavana jašče ŭ časy brytanskaha kałanijalnaha kiravańnia i siońnia rehulujecca Kryminalna-pracesualnym kodeksam, źjaŭlajučysia adnoj z samych surovych formaŭ pakarańnia.

Łupcavańnie rozhami jak sudovaja miera pakarańnia isnuje taksama ŭ inšych byłych brytanskich kałonijach, u pryvatnaści, u Małajzii i Bruniei, a taksama praktykujecca (na asnovie zakanadaŭstva šaryjatu) u indaniezijskaj pravincyi Ačech. Na zdymku: ratondavyja hučki, jakija vykarystoŭvajucca dla łupcavańnia ŭ indaniezijskaj pravincyi Ačech. Fota: AP Photo / Reza Saifullah

Pavodle źviestak Ministerstva ŭnutranych spraŭ, łupcavańnie źjaŭlajecca abaviazkovym pakarańniem dla 65 złačynstvaŭ, a jašče za 96 złačynstvaŭ jano moža być vykarystana pa rašeńni suda. Žančyny, dziaŭčynki i mužčyny, starejšyja za 50 hadoŭ, vyzvalajucca ad hetaha vidu pakarańnia.

Akramia sudovaha prymianieńnia, łupcavańnie praktykujecca ŭ turmach jak dyscyplinarnaje spahnańnie za parušeńnie ŭnutranych pravił, a taksama isnuje ŭ vajskovych dyscyplinarnych kodeksach i dazvolena ŭ škołach jak dyscyplinarnaja miera ŭ dačynieńni da chłopčykaŭ.

Varta adznačyć, što papraŭka taksama źniała abaviazkovaje łupcavańnie za niekatoryja inšyja złačynstvy, u tym liku za vandalizm. Adnosna jaho ciapier rašeńnie ab užyvańni rozhaŭ budzie prymacca na mierkavańnie suda.

Pravaabarončyja hrupy rehularna krytykujuć Sinhapur za vykarystańnie łupcavańnia i zaklikajuć spynić hetuju praktyku.

Takija arhanizacyi, jak Human Rights Watch i Amnesty International, ličać łupcavańnie formaj katavańniaŭ u adpaviednaści ź mižnarodnym pravam.

Kamientary da artykuła