Ukrainskaja rakieta «Fłaminha» ŭ niečym lepšaja za amierykanskija «Tamahaŭki»
Novaja ŭkrainskaja kryłataja rakieta «Fłaminha» pavodle niekatorych pakaźnikaŭ pieraŭzychodzić amierykanskuju kryłatuju rakietu Tomahawk. U pryvatnaści — pavodle dalokaści i pamieru bajavoj častki.
Palot kryłataj rakiety «Fłaminha». Fota: Fire Point
Pra heta paviedamlaje RBK-Ukraina sa spasyłkaj na vydańnie The Independent.
Vydańnie adznačaje, što «Fłaminha» z zajaŭlenaj dalokaściu palotu 3000 kiłamietraŭ i bajavym abstalavańniem bolš za tonu — adna z najlepšych raspracovak Ukrainy. Jana abstalavanaja savieckim turbavintavym ruchavikom i moža lotać z chutkaściu kala 900 kiłamietraŭ za hadzinu.
Ale niahledziačy na toje, što rakieta vyrablenaja z vykarystańniem starych savieckich technałohij, spałučanych z sučasnymi raspracoŭkami, jana kaštuje stolki ž, kolki amierykanskaja kryłataja rakieta Tomahawk. Pryciahvaje ŭvahu taksama istotnaja pieravaha pa dalokaści i vazie bajavoj častki: 3000 km suprać 1500 km i 1100 kh suprać 500 kh.
Jašče adna pieravaha — hetyja rakiety całkam znachodziacca pad kantrolem vyklučna ŭkrainskich uzbrojenych sił. Sajuźniki nie zdolnyja abmiažoŭvać ich vykarystańnie suprać celaŭ u hłybini Rasii, jak heta rabili ZŠA z rakietami ATACMS i Francyja i Vialikabrytanija z rakietami Storm Shadow.
«Kijeŭ moža stralać z «Fłaminha» pa luboj celi, jakuju zachoča atakavać. Jon nie abmiežavany tym, što, pavodle słovaŭ «sajuźnikaŭ» Ukrainy, jon moža i nie moža rabić u baraćbie z rasijskimi vojskami ŭvarvańnia», — piša vydańnie.
Pavodle słovaŭ prezidenta Ukrainy Uładzimira Zialenskaha, ciapier Ukraina samastojna vyrablaje bolš za 60% dalnabojnaj zbroi. A pradstaŭniki Fire Point kažuć, što hetaja rakieta moža nie adpaviadać niejkim standartam, ale nikoha heta nie chvaluje.
«Kali tabie celać u hałavu, ty nie dumaješ pra standarty, ty dumaješ, što «heta pavinna pracavać». Nam było abyjakava, ci adpaviadajem my standartam NATA. Nas cikaviła tolki toje, kab naša zbroja była efiektyŭnaj na froncie, a nie na papiery. U vyniku my zdoleli stvaryć vielmi efiektyŭnuju zbroju», — rastłumačyła vydańniu techničny dyrektar kampanii.
Jašče ŭ vieraśni prezident Zialenski zajaviŭ, što Ukraina aktyŭna raspracoŭvaje dalnabojnaje ŭzbrajeńnie. Apošnija vyprabavańni prajšli paśpiachova, i nastupny etap — zapusk sieryjnaj vytvorčaści.
Taksama Ukraina pačała sieryjnuju vytvorčaść kryłatych rakiet «Fłaminha» z dalokaściu palotu da 3000 kiłamietraŭ. Pavodle słovaŭ Zialenskaha, na masavuju vytvorčaść vyjduć da kanca hoda.
Akramia taho, jak jon śćviardžaje, Ukraina ŭžo dzieviać razoŭ nanosiła ŭdary z vykarystańniem rakiety «Fłaminha» — na ciapierašni momant jana ličycca najlepšaj ukrainskaj kryłataj rakietaj.