U Słuckim rajonie nieviadomyja vykapali tui z mohiłak. I heta nie adzinaja dla ich prablema

Na mohiłkach u Bokšycach Słuckaha rajona nieviadomyja vykrali try tui. Pry hetym miascovyja žychary ŭžo nie ŭpieršyniu źviartajuć uvahu na prablemy achovy mohiłak va ŭsim rajonie, piša BGmedia.

Zdymak ilustracyjny, zhienieravany štučnym intelektam. Krynica: BGMedia 

 Žycharka Słuckaha rajona paviedamiła pra niepryjemny incydent: z mahiły na mohiłkach u vioscy Bokšycy vykapali try tui.

«Apisać emocyi, kali sutykaješsia z hetym, prosta niemahčyma. Praviercie pachavańni svaich blizkich, mahčyma, i vy paciarpieli», — piša jana ŭ adnym ź miascovych kanałaŭ.

Padobnyja vypadki ŭ rajonie nie adzinkavyja: jak uzhadvaje adna z čytačak, kala piaci hadoŭ tamu padobny kradziež adbyŭsia ŭ vioscy Branavičy. Hetyja naviny vyklikali abureńnie ŭ miascovych žycharoŭ, pra što śviedčać niehatyŭnyja reakcyi pad navinami.

Vandalizm i psavańnie pomnikaŭ

Prablemy mohiłak Słuckaha rajona nie abmiažoŭvajucca adnym kradziažom tujaŭ. U samim Słucku staroje nadmahille Lucyny Ordy paškodžana: hranitnyja plity byli častkova abrabavanyja nieviadomymi asobami.

Nadmahille Lucyny Ordy ŭ Słucku. Fota: budzma.org

Za mahiłami sałdat Druhoj suśvietnaj vajny zamacavanyja haradskija pradpryjemstvy, jakija dahladajuć ich i ŭskładajuć vianki da 9 maja. U katalickaj častcy mohiłak pieryjadyčna pravodziać uborku kataliki. Taksama, u abvieščany dziaržavaj Hod uparadkavańnia da rabot na mohiłkach pryciahvajuć školnikaŭ, supracoŭnikaŭ dziaržpradpryjemstvaŭ.

Ale, niahledziačy na heta, prablema zastajecca. Mohiłki znachodziacca ŭ padparadkavańni ŽKH, i mienavita jany pavinny sačyć za paradkam, apieratyŭna vyjaŭlać akty vandalizmu i źviartacca ŭ milicyju. Adnak na praktycy sapraŭdnaja achova i ŭparadkavańnie nie ŭ najlepšym stanie.

Kozy paśviacca na pachavańniach savieckich sałdat. Fota miascovaha žychara

Adsutnaść achovy i historyka-miemaryjalnaha statusu

Mohiłki ŭ Słucku zakrytyja dla novych pachavańniaŭ ź vieraśnia 1981 hoda i nie achoŭvajucca, a terytoryja nie maje histaryčnaha abo miemaryjalnaha statusu. Brama XIX stahodździa taksama nie ličycca pomnikam architektury. Jak adznačajuć miascovyja krajaznaŭcy, u krainie, dzie niama naležnaj pavahi da historyi, achova takich miescaŭ stanovicca asabliva składanaj.

Na terytoryi mohiłak časam źbirajucca ludzi, jakija złoŭžyvajuć ałkaholem, u tym liku moładź. Tut adbyvajucca razbureńnie pomnikaŭ, naniasieńnie nadpisaŭ na mahilnych plitach viadomych ludziej. Naprykład, mahiła člena Vajskovaj rady časoŭ Rasijskaj Impieryi hienierała Michaiła fon Mieviesa była źniščanaja, a pomnik razmalavany.

Paškodžanyja mohiłki ŭ Słucku. Fota: budzma.org

Prablemy roznych častak mohiłak

Prablemy zakranajuć i inšyja ŭčastki: na mohiłkach sałdat Druhoj suśvietnaj vajny časam paśviać kozaŭ, na habrejskaj častcy ludzi zaŭvažali karoŭ. Niahledziačy na abvieščany dziaržavaj Hod uparadkavańnia, u Słucku i pa rajonie praciahvajucca prablemy z achovaj i padtrymkaj mohiłak.

Karovy na mohiłkach u Słucku. Fota miascovych žycharoŭ

Kamientary da artykuła