Daradca premjera Litvy: Biełaruś admoviłasia adkryvać evakuacyjnyja kalidory dla litoŭskich fur

U sieradu ź Biełarusi pryjšoŭ admoŭny adkaz na zapyt ab adkryćci evakuacyjnych kalidoraŭ na miažy, paviedamiŭ savietnik premjer-ministra Ihnas Alhirdas Dabravolskas. Pa jaho słovach, fury litoŭskich kampanij pa-raniejšamu znachodziacca ŭ zakładnikach i nie mohuć viarnucca ŭ krainu, piša Delfi.lt.

«Siońnia atrymany adkaz biełaruskich pamiežnikaŭ na litoŭski list. Zhoda na adkryćcio evakuacyjnaha kalidora dla litoŭskich i jeŭrapiejskich pieravozčykaŭ nie atrymana, našy kampanii pa-raniejšamu znachodziacca ŭ zakładnikach», — zajaviŭ I. Dabravolskas.

«Litva nieadnarazova adznačała, što našy miažy adkryty dla našych i jeŭrapiejskich pieravozčykaŭ, i tolki Biełaruś, jakaja nie moža spravicca z kantrabandnymi pavietranymi šarami, jakija pradstaŭlajuć niebiaśpieku dla našaj hramadzianskaj avijacyi, stvaraje eskałacyju i paharšaje pieraškody dla vyjezdu», — praciahnuŭ jon.

Savietnik premjer-ministra adznačyŭ, što biełaruski dakumient budzie razhledžany.

Pa jaho słovach, na dadzienym etapie rašeńni pavinny prymacca ŭ pieršuju čarhu susiedniaj dziaržavaj.

«U lubym vypadku biełaruski dakumient budzie razhledžany, ale pierš za ŭsio, jak my pastajanna padkreślivajem, Biełaruś pavinna spynić hibrydnuju ataku suprać avijacyi i biaśpieki našych hramadzian», — zajaviŭ I. Dabravolskas.

«My kłapocimsia ab biaśpiecy litoŭskich i jeŭrapiejskich kampanij, ale rašeńni pavinny być pryniaty ŭ pieršuju čarhu biełaruskim bokam», — dadaŭ jon.

U paniadziełak kiraŭnik Nacyjanalnaha centra kiravańnia kryzisami Viłmantas Vitkaŭskas zajaviŭ, što da Biełarusi znoŭ źviernucca z prośbaj ab adkryćci evakuacyjnaha kalidora.

Pa jaho słovach, na hety raz zapyt byŭ zrobleny na ŭzroŭni hałoŭnaha ŭpraŭleńnia pa spravach miažy z metaj adkryćcia evakuacyjnych kalidoraŭ na pamiežnych punktach propusku «Miedniki» i «Salečniki» ŭ abodvuch napramkach.

Kamientary da artykuła