Paŭłu Duravu dazvolili vyjazdžać za miežy Francyi

Francuzskija ŭłady dazvolili zasnavalniku Telegram Paŭłu Duravu znoŭ svabodna vyjazdžać za miežy krainy. Heta rašeńnie było pryniata 10 listapada. Ciapier jon bolš nie abaviazany adznačacca ŭ palicyi, paviedamlaje Bloomberg.

Pavieł Duraŭ. Fota: sacsietki

Letaś u žniŭni francuzskija ŭłady zatrymali Durava, kali jon vychodziŭ z pryvatnaha samalota ŭ paryžskim aeraporcie. Jon pravioŭ pad vartaj čatyry dni i davaŭ pakazańni ŭ miežach rasśledavańnia, źviazanaha ź niedastatkovaj maderacyjaj kantentu ŭ Telegram i admovaj ad supracoŭnictva z francuzskimi pravaachoŭnymi orhanami.

Jamu inkryminavali taksama saŭdzieł u raspaŭsiudžańni škodnych prahram i nieprystojnych materyjałaŭ z udziełam niepaŭnaletnich, a taksama admyvańnie hrošaj, atrymanych ź niezakonnych krynic.

Sam Paŭła Duraŭ pastajanna admaŭlaŭ usie abvinavačvańni i paabiacaŭ, što miesiendžar budzie supracoŭničać z uładami, a asoby, jakija vykarystoŭvajuć Telegram u złačynnych metach, nie pavinny pahražać biaśpiecy sumlennych karystalnikaŭ.

Paśla zatrymańnia ŭ 2024 hodzie Duraŭ zapłaciŭ zakład u pamiery 5 miljonaŭ jeŭra, što dazvoliła jamu vyjści na volu. Jamu zabaranili pakidać Francyju i abaviazali adznačacca va ŭładaŭ dvojčy na tydzień. Paśla miery pa abmiežavańni źmiakčyli, Duravu dazvolili abmiežavanyja pajezdki ŭ Dubaj. Ciapier ža ŭsie abmiežavańni na vyjezd z Francyi ŭvohule admienienyja.

Kamientary da artykuła