«Ńju Hlen» adpraviŭsia da Marsa. Blue Origin Džefa Biezasa paśpiachova zapuściła rakietu sa spadarožnikami NASA
Dla Blue Origin vialikim pośpiecham staŭ nie tolki sam pa sabie start «Ńju Hlen» (usiaho druhi ŭ historyi), ale i biaśpiečnaje viartańnie na Ziamlu hihanckaha bustara pieršaj stupieni.
Fota: Miguel J. Rodriguez Carrillo/Getty Images
Kaśmičnaja kampanija Blue Origin miljardera Džefa Biezasa paśpiachova zapuściła z kasmadroma na mysie Kanavierał u Fłarydzie svaju rakietu New Glenn, jakaja pavinna dastavić da Marsa dva spadarožniki amierykanskaha kaśmičnaha ahienctva NASA, piša Bi-bi-si.
Dla Blue Origin vialikim pośpiecham staŭ nie tolki sam pa sabie start «Ńju Hlen» (usiaho druhi ŭ historyi), ale i biaśpiečnaje viartańnie na Ziamlu hihanckaha bustara pieršaj stupieni.
Razhonny błok vyšynioj u 17‑paviarchovy dom paśpiachova apuściŭsia na płavučuju płatformu ŭ Atłantyčnym akijanie prykładna praz 10 chvilin paśla startu. Bustar atrymaŭ nazvu «Never Tell Me the Odds» — heta viadomaja fraza hieroja kinaepapiei «Zornyja vojny» Chana Soła, jakuju možna pieravieści jak «Nikoli mnie nie kažy pra šancy!»
Raniej šmatrazovaje vykarystańnie razhonnych błokaŭ, jakoje značna źmianšaje košt dastaŭki hruzaŭ u kosmas, zmahła ŭkaranić tolki kampanija Space X Iłana Maska — hałoŭny kankurent Blue Origin — ź jaje papularnaj rakietaj Falcon.
Paśla pryziamleńnia bustara Mask napisaŭ karotkaje paviedamleńnie ŭ svajoj sacsietcy Ch, u jakim pavinšavaŭ Biezasa z pośpiecham.
Padčas pieršaha startu New Glenn, u studzieni hetaha hoda, rakietu ŭdałosia vyvieści ŭ kosmas, ale buster byŭ stračany.
Ekśpierty spadziajucca, što ciapier Blue Origin zmoža naładzić rehularnyja starty rakiet, jakija vykarystoŭvajuć razhonnyja błoki znoŭ i znoŭ. «Zapusk, pryziamleńnie, paŭtor pracedury. Heta pačynajecca siońnia», — skazaŭ z hetaj nahody Edzi Sejfiert, adzin z tych, chto kamientavaŭ zapusk u internecie (cytata pa ahienctvu AFP).
Rakieta New Glenn nazvana ŭ honar Džona Hlena — pieršaha amierykanskaha astranaŭta, jaki vyjšaŭ na arbitu Ziamli bolš za 60 hadoŭ tamu.
Misija da Marsa
Zapusk New Glenn sa spadarožnikami NASA staŭ pieršaj kamiercyjnaj misijaj pa dastaŭcy hruzaŭ u kosmas, jakuju paśpiachova pačała kampanija Blue Origin.
Na borcie rakiety znachodziacca dva spadarožniki pad nazvaj Blue i Gold (to bok «sini» i «załaty»), jakija pavinny dasiahnuć Marsa ŭ 2027 hodzie i vyjści na eliptyčnyja arbity vakoł płaniety.
Jak piša ahienctva Reuters, paśla hetaha jany buduć na praciahu 11 miesiacaŭ vyvučać kaśmičnaje nadvorje kala płaniety: ich aparatura stanie rehistravać asablivaści ŭzajemadziejańnia kaśmičnaha vietru (pastajannaha patoku čaścic z karony Sonca) z adnosna słabym mahnitnym polem Marsa. U tym liku navukoŭcy spadziajucca ź ich dapamohaj zrazumieć, jak heta ŭzajemadziejańnie moža ŭpłyvać na źniasileńnie marsijanskaj atmaśfiery.
Džozief Uestłejk, śpiecyjalist NASA ŭ halinie hielijafiziki, rastłumačyŭ u strymie, što aparaty Blue i Gold spačatku znojduć «spryjalnaje i biaśpiečnaje miesca dla parkovačnaj arbity», kab zrabić «nazirańni pra kaśmičnaje nadvorje ŭ nas na Ziamli» (cytata pa ahienctvu AFP).
A vosieńniu 2026 hoda, kali Ziamla i Mars apynucca ŭ zručnym stanoviščy adzin nasuprać adnaho, rakieta «adšturchniecca» ad ziamnoha pryciahnieńnia i pačnie šlach da Marsa.
Taki typ zapuskaŭ moža dazvolić adpraŭlać misii da Marsa čaściej, pakolki dla jaho nie patrabujecca čakać patrebnaha «akna» ŭ stanoviščy dźviuch płaniet (jano adkryvajecca prykładna adzin raz u dva hady).