Biełstat prapanuje zrabić udzieł u pierapisie nasielnictva abaviazkovym
Biełstat prapanuje źmianić zakon ab pierapisie nasielnictva i zrabić udzieł u im abaviazkovym dla ŭsich hramadzian. Adpaviedny prajekt zakona 14 listapada vyniesieny na hramadskaje abmierkavańnie.
Fota ilustracyjnaje
Jak tłumačać aŭtary zakonaprajekta, novyja praŭki pavinny zrabić pierapis bolš efiektyŭnym i nibyta nablizić jaho da mižnarodnych normaŭ i rekamiendacyj.
Hałoŭnaje novaŭviadzieńnie, jakoje prapanujuć uvieści — abaviazak hramadzianina nie tolki nie pieraškadžać pierapisu, jak paznačana ŭ zakonach ciapier, ale i abaviazkova ŭdzielničać u im i padavać praŭdzivyja źviestki. Pry hetym asobnaj adkaznaści za admovu ŭdzielničać u pierapisie ŭ dakumiencie nie praduhledžana — u im zastajecca tolki ahulnaja farmuloŭka, što parušeńnie zakanadaŭstva ciahnie adkaznaść, ustanoŭlenuju zakonami.
Biełstat taksama prapanuje źnizić uzrost, ź jakoha čałaviek moža samastojna zapaŭniać pierapisnyja listy, da 15 hadoŭ. Heta patłumačyli tym, što padčas pierapisu 2019 hoda ŭźnikali ciažkaści sa studentami i padletkami, jakija žyvuć asobna ad baćkoŭ, ale pa zakonie jašče nie paŭnaletnija.
Akramia taho, zakonaprajekt praduhledžvaje novy sposab udziełu ŭ pierapisie — praź internet z dapamohaj śpiecyjalnaj prahramy. Raniej infarmacyju možna było padać tolki pry asabistym apytańni pa miescy žycharstva abo na pierapisnych učastkach.
Abmierkavańnie zakonaprajekta budzie praciahvacca da 23 listapada 2025 hoda.