Byłaja premjerka Isłandyi: Isłandskaja mova pad pahrozaj źniknieńnia

Byłaja premjer-ministarka Isłandyi, a adnačasova piśmieńnica Katryn Jakabsdocir zajaviła, što isłandskaja mova moža apynucca pad pahrozaj źniknieńnia ŭžo na praciahu adnaho pakaleńnia. Pryčynaj jana ličyć chutkaje raźvićcio štučnaha intelektu i daminavańnie anhlijskaj movy ŭ miedyja i sacsietkach, piša The Guardian.

Katryn Jakabsdocir. Fota: AP Photo/Geert Vanden Wijngaert, File

Padčas vystupleńnia na litaraturnym fiestyvali Iceland Noir u Rejkjaviku paśla vychadu jaje druhoha ramana palityk adznačyła, što ŭ krainie adbyvajucca «radykalnyja» źmieny: usio bolš ludziej čytaje i razmaŭlaje pa-anhlijsku, a isłandskaja vykarystoŭvajecca radziej. Pavodle jaje słoŭ, praz heta razam z movaj mohuć źnikać kaštoŭnaści i ŭnikalnaje myśleńnie naroda.

Isłandskaj movaj vałodajuć usiaho kala 350 tysiač čałaviek, i jana ličycca adnoj z najbolš zachavanych z časoŭ staražytnaści ŭ śviecie. Ale Jakabsdocir ličyć, što kraina robić niedastatkova dla jaje padtrymańnia, a moładź siońnia litaralna «apajasanaja» anhłamoŭnym kantentam.

Jana taksama adznačyła, što Isłandyja aktyŭna sprabuje raźvivać vykarystańnie štučnaha intelektu na rodnaj movie. U pryvatnaści, Ministerstva adukacyi razam sa startapam Anthropic zapuściła adzin ź pieršych nacyjanalnych adukacyjnych prajektaŭ, u miežach jakoha sotni nastaŭnikaŭ atrymajuć dostup da instrumientaŭ štučnaha intelektu.

U vystupleńni Jakabsdocir uzhadała časy, kali kraina była pad uładaj Danii i isłandskaja mova pieražyvała mocny dacki ŭpłyŭ. Tady situacyju ŭdałosia vypravić dziakujučy mocnamu nacyjanalnamu ruchu. Na jaje dumku, ciapier Isłandyi znoŭ patrebnaja padobnaja padtrymka movy, bo staŭleńnie da jaje ŭpłyvaje na myśleńnie ludziej i moža vyznačyć budučyniu ŭsioj nacyi.

Kamientary da artykuła