Doktara sacyjałahičnych navuk i supracoŭnicu Akademii navuk asudzili za «finansavańnie ekstremizmu»

Apošniaja viadomaja pasada Iryny Andras — viadučy navukovy supracoŭnik u Instytucie ekanomiki.

Iryna Andras. Fota ź jaje sacsietak, apracavanaje ŠI dla palapšeńnia jakaści

Irynie Andras 49 hadoŭ. Rodam jana ź Pinska, skončyła škołu №12 u 1993‑m hodzie. Jaje profilnaja navukovaja tema — sacyjałohija pradprymalnictva.

U 2003‑m abaraniła kandydackuju dysiertacyju na temu «Sacyjakulturnyja faktary farmiravańnia pradprymalnictva ŭ ekanomicy Respubliki Biełarusi». Z 2003‑ha pa 2006‑ty była dacentam kafiedry kiravańnia Instytuta kiravańnia i pradprymalnictva. Vykładała ŭ BDU.

Z 2010 pa 2011 hady Andras viała aŭtarskuju rubryku «Pradprymalnictva» ŭ dziaržaŭnaj haziecie «Respublika». Vystupała na šmatlikich kanfierencyjach, u tym liku za miažoj. Źjaŭlajecca členam Jeŭrapiejskaj sacyjałahičnaj asacyjacyi.

Iryna Andras na kanfierencyi ŭ Kijeŭskim palitechničnym instytucie imia Sikorskaha ŭ 2018 hodzie. Skrynšot ź jutuba KPI

Była daktarantam kafiedry sacyjałohii fakulteta fiłasofii i sacyjalnych navuk Biełaruskaha dziaržaŭnaha ŭniviersiteta. U 2021‑m hodzie abaraniła dysiertacyju na temu «Sacyjalna-ekanamičnaja transfarmacyja pradprymalnictva ŭ Respublicy Biełaruś» i atrymała stupień doktara sacyjałahičnych navuk.

Apošniaje viadomaje miesca pracy Andras — viadučy navukovy supracoŭnik Centra čałaviečaha raźvićcia Instytuta ekanomiki Akademii navuk. Jaje publikacyi spynilisia paśla 2024 hoda — imavierna, ci naprykancy 2024-ha, ci na pačatku 2025‑ha daśledčycu zatrymali i zvolnili z pracy.

Irynu Andras asudzili ŭ 2025‑m hodzie pa artykule 361‑2 KK — «finansavańnie ekstremisckaj dziejnaści». Miarkujučy pa tym, što jaje sudzili pa staroj redakcyi zakona, heta byŭ nievialiki danat u 2020‑m hodzie.

Irynie prysudzili «chatniuju chimiju».

Kamientary da artykuła