Studentka ŭ Minsku zabrała $20 tysiač dla machlaroŭ, sieła na ciahnik, ale pieradumała i źviarnułasia ŭ milicyju
U Minsku ŭ milicyju źviarnułasia 18‑hadovaja studentka i raskazała, što pa zadańni nieznajomca zabrała hrošy ŭ dźviuch piensijanierak. Jana sieła na ciahnik da susiedniaj krainy, adnak u darozie zrazumieła, što była ŭciahnutaja ŭ machlarstva, paviedamlaje staličnaja milicyja.
Za dva dni da hetaha afierysty patelefanavali studentcy pad vyhladam supracoŭnikaŭ «Biełpošty» i paprasili zabrać pasyłku. Jana zhadziłasia i nazvała kod z SMS. Paśla hetaha ź joj źviazaŭsia łžepravaachoŭnik.
Jon pad pahrozaj kryminalnaj adkaznaści pierakanaŭ studentku supracoŭničać i dapamahać takim ža padmanutym minčanam.
Dziaŭčyna źjeździła pa dvuch adrasach, dzie nazvała kodavyja słovy i zabrała ŭ žančyn kala $20 tys. Uviečary jana raskazała pra ŭsio siabroŭkam. Paśla razmovy ź imi pačała sumniavacca ŭ svaich dziejańniach, adnak usio ž kupiła bilet na ciahnik. Ale, dajechaŭšy da Oršy, pieradumała i źviarnułasia ŭ milicyju.
Hrošy kanfiskavanyja i buduć viernutyja paciarpiełym. Studentka paźbiehła kryminalnaj adkaznaści za ŭdzieł u złačynnaj schiemie.