«Byli stalinki, chruščoŭki, a ciapier buduć siamaški». U centry Hrodna sabralisia restaŭravać Dom bytu — prajekt nie ŭsie acanili
U abłasnym centry pakazali prajekt restaŭracyi budynka Domu bytu, jaki mieścicca ŭ histaryčnym centry. Zajmacca pierabudovaj budzie hrodzienski «hatelny karol» Stanisłaŭ Siamaška.
Rendar, jak budzie vyhladać budynak Domu bytu paśla rekanstrukcyi. Fota: telehram @grodno_ispolkom
U styli «pad daŭninu»
Były Dom bytu vykupiŭ hrodzienski biźniesoviec Stanisłaŭ Siamaška. Ciapier jon pradstaviŭ prajekt, jak budzie vyhladać abnoŭleny budynak, i raskazaŭ, što ŭ im raźmieściać.
Hrodzienski Dom bytu pabudavany ŭ 1971 hodzie ŭ styli savieckaha madernizmu. Siamaška płanuje pierabudavać jaho ŭ styli «pad daŭninu».
Niahledziačy na toje što hramadskija abmierkavańni jašče iduć i praciahnucca da 8 śniežnia, biźniesoviec upeŭnieny, što praz vosiem miesiacaŭ rekanstrukcyja ŭžo budzie zavieršanaja.
Zhodna z płanam, na pieršym paviersie raźmieściacca kafe, kvietkavaja krama i inšyja abjekty servisu. Druhi pavierch zojmuć ofisnyja pamiaškańni i internet-kłuby. Na vierchnich uzroŭniach źjaviacca apartamienty dla doŭhaterminovaj arendy abo kupli.
U budynka źjavicca taksama dadatkovy mansardny pavierch.
«Kałhasny styl z raźmiaščeńniem amurčykaŭ pa kole»
Miarkujučy z kamientaroŭ hrodziencaŭ u sacyjalnych sietkach, daloka nie ŭsie padtrymlivajuć ideju pierabudovy Doma bytu ŭ takim styli.
«Ahra-treš u styli Siamaški», — hučyć adzin z samych papularnych kamientaroŭ pad videa ŭ akaŭncie TRK «Hrodna» ŭ instahram.
«Byli stalinki, chruščoŭki, a ciapier buduć «siamaški». Sumna, što vialikija hrošy i mahčymaści nie iduć u kamplekcie z dobrym hustam», — napisaŭ inšy haradzieniec.
Heta budzie ŭžo nie pieršy budynak u centry Hrodna, jaki naležyć biźniesoŭcu. Tamu ŭ niejkim sensie možna skazać, što Siamaška sapraŭdy maje svoj styl. Vyniki jaho pracy vyklikajuć nieadnaznačnyja acenki ŭ haradžan.
Apart-hatel i handlovy centr «Pałac». Abodva budynki naležać Siamašku. Fota: Jandeks Panaramy
«Siamaška jak zaŭždy zrobić usio ŭ svaim kałhasnym styli z raźmiaščeńniem amurčykaŭ pa kole», — piša žančyna.
«Navošta budavać psieŭdahistaryčny budynak? Lepš prosta abnavić i pakinuć šklany varyjant. U Hrodnie i tak šmat histaryčnych damoŭ, jakim sapraŭdy treba viarnuć pieršapačatkovy vyhlad, a nie ŭzvodzić niešta pad daŭninu», — miarkuje inšy kamientatar.
Rendar, jak budzie vyhladać budynak Domu bytu paśla rekanstrukcyi. Fota: telehram @grodno_ispolkom
«Navošta na madernovy budynak naviešvać dekaracyi «daŭniny»? Heta nie bjecca zusim. Jość mnostva sposabaŭ papracavać z budynkami hetaj epochi, a nie lapić Frankienštejna», — aburajecca haradzienka.
«Dobraha dyzajniera ŭ kampanii spadara Siamaški adnaznačna nie chapaje!» — dadaje inšy čałaviek.
Nie tolki hrodziency raskrytyvali prajekt.
«Heta nie styl, heta śmiećcie. Tut navat architektaram być nie treba, kab razumieć — heta prosta adstoj. Hospadzi, nu internet ža jość, pahuhli, pahladzi trendy, pahladzi, što budujuć u śviecie. Nu kali niama hustu, dyk pahladzi na pracy tych, u kaho jon jość. Choć ja i nie z Hrodna, ale kryŭdna za horad, kali ŭ 2025‑m takim voś zabudoŭvajuć histaryčny centr», — taki kamient pakinuli pad hetaj navinoj u instahram-akaŭncie «AŭtaHrodna».
Adzin z karystalnikaŭ navat pažartavaŭ, što Siamaška ŭziaŭ čarhovy budynak u zakładniki.
Siarod kamientataraŭ taksama davoli papularnaje mierkavańnie, što hety budynak i ŭ ciapierašnim vyhladzie nie ŭpisvajecca ŭ zabudovu, tamu jaho naohuł varta źnieści.
Tak były Dom bytu ŭ Hrodnie vyhladaje ciapier. Fota: Jandeks Panaramy
«A Siamaška małajčyna!»
Ale jość i tyja, chto dziakuje Siamašku. Asabliva pad videa, raźmieščanym u instahramie TRK «Hrodna».
«Mnie padabajecca, jak šmat ludziej asudžajuć toje, što robić Siamaška. I jak praviła, heta tyja, chto sam dla horada ničoha nie zrabiŭ — ni papierku za saboj nie prybraŭ, ni kuścik nie pasadziŭ. Lohka prynižać čužyja dasiahnieńni. A Siamaška małajčyna. Byli «hniłyja zuby» ŭ centry, a ciapier stanovicca pryhažej», — adznačyła haradžanka.
Jašče adna žančyna taksama padtrymała biźniesoŭca.
«Małajčyna! Čałaviek, jaki svajoj pracaj i ŭčynkami robić žyćcio ŭ horadzie lepšym!»
Na što ŭ adkaz adzin z hrodziencaŭ zaŭvažyŭ, što pieradusim jon robić žyćcio lepšym sabie. A histaryčny centr Hrodna ad takich nieśpiecyjalistaŭ treba abaraniać.