Śledstva pryznała nievinavataść kiroŭcy tralejbusa, jaki na pierachodzie źbiŭ piešachoda ŭ Mahilovie
Dniom 25 vieraśnia na praśpiekcie Puškinskim u Mahilovie 39‑hadovy mužčyna trapiŭ pad koły tralejbusa i atrymaŭ ciažkija traŭmy. U dačynieńni vadziciela hramadskaha transpartu była raspačataja kryminalnaja sprava.
Karcinu DTZ dapamahli vyznačyć zapisy ź videarehistratara tralejbusa i kamiery nazirańnia, a taksama śledčy ekśpierymient.
Vyjaŭlena, što piešachod vyjšaŭ na prajeznuju častku ŭ miežach pierachoda na čyrvony sihnał śviatłafora.
Pavodle danych analizu, u kryvi paciarpiełaha było 4,3 pramile etyłavaha śpirtu.
Kiroŭca jechaŭ na spraŭnym tralejbusie z chutkaściu kala 44 km/h, zahadzia źnižaŭ chutkaść pierad prypynkam i padavaŭ hukavy sihnał. «Niahledziačy na padadzieny im hukavy sihnał i prymianieńnie tarmažeńnia, piešachod chistkaj chadoj vyjšaŭ z tratuara na darohu», — paviedamili ŭ SK.
Śledstva pryjšło da vysnovy, što kiroŭca tralejbusa nie dapuściŭ parušeńniaŭ PDR, jakija byli b pryčynaj zdareńnia.
U suviazi z adsutnaściu ŭ dziejańniach kiroŭcy składu złačynstva kryminalny pieraśled byŭ spynieny.