Što stała pryčynaj učorašniaha adklučeńnia Spotify, X, Chatgpt i častki sajtaŭ
U aŭtorak u vyniku maštabnaha zboju ŭ sistemie Cloudflare, jakaja absłuhoŭvaje kala 20% usich internet-resursaŭ, mnohija anłajn-servisy pierastali pracavać.
Abjom zapytaŭ z pamyłkaj 5xx u sietcy Cloudflare 18 listapada. Fota: Cloudflare
Heta zakranuła papularnyja płatformy kštałtu Spotify i X, a taksama amal usie bujnyja niejrasietki i navat niekatoryja videahulni.
U kampanii nazvali pryčyny. Tak, pavodle słoŭ techdyrektara Ejna Kniechta i hiendyrektara Mećju Prynsa, zboj nie byŭ vyklikany kibieratakaj abo škodnaj dziejnaściu.
Tryhieram stała schavanaja pamyłka ŭ adnym z unutranych servisaŭ, jakija adkazvajuć za abaronu ad botaŭ. Hetaja pamyłka ŭźnikła paśla standartnaha źmianieńnia kanfihuracyi i pryviała da łancuhovaj reakcyi, što zakranuła inšyja kampanienty hłabalnaj sietki Cloudflare.
Pavodle infarmacyi na aficyjnaj staroncy statusu Cloudflare, zboj pačaŭsia pryblizna a 14:48 pavodle minskaha času i praciahvaŭsia kala troch hadzin. Da 17:42 kampanija paviedamiła ab zaviaršeńni rabot pa adnaŭleńni. U Cloudflare adznačyli, što niekatoryja servisy, chutčej za ŭsio, buduć karotkačasova pracavać sa zbojami praz naturalny ŭsplosk trafiku paśla taho, što adbyłosia.
Učorašnija prablemy vyjšli za miežy anłajn-servisaŭ i zakranuli navat abjekty fizičnaha śvietu. Naprykład, naviedniki McDonald's i inšych ustanoŭ, u pracy terminałaŭ jakich taksama zadziejničanyja servisy Cloudflare, nie mahli zamović sabie ježu, piša Office Life.
Heta ŭžo treci bujny zboj za miesiac. U kastryčniku bolšaja častka rehijona US-East-1 u AWS była adklučana bolš čym na dźvie hadziny paśla taho, jak u Amazon adbyŭsia DNS-zboj. Usiaho praź niekalki dzion zdaryŭsia maštabny zboj Microsoft Azure. Hetyja incydenty paŭpłyvali amal na kožnaha karystalnika internetu, bo na Azure i AWS prypadaje kala 24% i 30% rynku vobłačnych vyličeńniaŭ adpaviedna.